Mizoram sawrkar flagship program – SEDP family oriented-a kalpui, a thawhkhatnaa chhungkaw sing ruk thlanchhuah atangin chhungkaw 59736 hnenah an dawn tur Rs. 50000 pek a ni tawh a. Kumin September ralhma in a thawhnihnaah chhungkaw sing ruk hnenah bawk Rs. 50000 an dawn tur atangin first instalment Rs. 25000 pek vek hman tum a ni.
SEDP Executive Board chu an chairman, deputy chief minister Tawnluia hoin Family Oriented SEDP Phase-2 kalpui dan turah thil pawimawh relin Thawhlehni khan an thukhawm a. Heta report danin, a thawh khatna (Phase 1) hmangin chhungkaw 60000 hnenah tanpuina Rs 50000 sem tawh a ni a. Phase 2-ah hian beneficiary 60000 thlan chhuah eh tur a ni. MLA constituency tin atanga chhungkua 1400 thlan kaltlangin hamthatna dawngtu 56000 an awm thei dawn a; heng bak chhungkaw 4000 dang chu MLA constituency lian deuhah pek belh emaw a mamawh zual chhungkuate SEDP Governing Board remtihnaa pek tur a ni.
Tunah Phase-I atangin beneficiary 59736 (Agriculture 2163, AH & Vety 37379, Commerce & Industries 10108, Fisheries 816, Horticulture 3055, LRS&WC 5612, Sericulture 50, Tourism 9, UD&PA 544) tihfel tawh niin, beneficiary dang 264 chu tunkar chhunga tihfel hman tum a ni.
Family Oriented SEDP Phase-2 hi instalment hniha then a ni a. First instalment-ah hian beneficiary-ten tanpuina Rs.25000 theuh an dawng hmasa phawt dawn a, second instalment-ah Rs 25000 an dawng leh dawn a, tanpuina hi line department-te kaltlanga sem tur a ni. Phase-2 hnuaia first instalment hi a tul angte tihfel a nih hnuah September 2023 ralhmaa sem chhuah vek tum a ni.
Thutkhawmah hian FO SEDP Phase 2 kalpui tura beneficiary neih dan, sum pek leh hun bituk chhunga kalpui dan tur ruahmante zirchian a nih bakah beneficiary-te hmalak dan enzui leh hlawhtlinna changte hmalakna phochhuah sakna – success story documentation tih dan tur tulte sawi niin, hemi kawnga department lam hmalak tawh chinte report a ni. A titha zualte lawmpui leh chawimawi kawnga ruahmanna neih dante pawh sawiho a ni bawk.
Chhungkaw 59736-in SEDP thawh khatna dawng tawh
