Chibai hlawh lo Kasatkina

Chibai hlawh lo Kasatkina!
Belarus thlawpna nena Russia-in athenawm ram Ukraine a run mekna chuan tennis khaw-velah hlet chhuah zui zelin, Pathianni French Open women’s singles round of 16 inkhel pakhatah pawh Ukrainian world number three hlui Elina Svitolina chuan 6-4 7-6 (7-5)-a a hneh Russian ninth seed Daria Kasat-kina a chibai duh lo leh a, quarter-final lama a tum leh tur Belarusian second seed Aryna Sabalenka pawh a chibai dawn chuang lo tih a sawichhuak hmiah!
Kum 28 mi Svitolina hian nikum October thla khan a pasal French player Gael Monfils lakah fanu Skai a hring a, nu a nih hnua grand slam tournament a khelh hmasakberah tleirawl kum 17 mi a nih lai ang maia zangkhai a la nih thu sawi chungin a chibai duh loh kum 26 mi Russian chu fakin, an ram chet dan sawisel ngam a nih avanga huaisen a tih thu a sawi.
Kasatkina chuan amah chibai duh lotu Svitolina chu inkhelh banah a kutzungpui van lai hawia tipir (thumbs-up) chungin a chet dan a pawmpui tih a lantir zauh a, Svitolina pawhin fakna thu chhakchhuak ve nghalin, “A din ngamna hian min tilawm takzet a, vantlang hriata an ram chet dan sawisel ngam khawpa huaisen a ni a, player tam tak tih ngam loh a ni,” a ti.
Nu a nih hnua Russian player pali a hmachhawn tawhte la chibai duh lo fai vek Svitolina hian a kal ngai renga la kal a tum thu sawi chungin last eight lama Belarusian Sabalenka nen an insut hunah pawh chibai turin a kut a pharchhuak dawn lo tih a sawilawk!
Fanu a hrin hnuah kum 2019-a Wimbledon leh US Open semi-finalist ni tawh Svitolina hian kumin April thla khan inelna a hmachhawn leh tan chiah a, Roland Garros tournament kal mek hi khelmuala a kirleh hnua tour-level tournament vawiruk a khelhna niin, French Open inbuatsaihna Strasbourg-ah khan title hlawhchhuakin, American Sloane Stephens hnehtu Sabalenka lakah fiahna lian zawk a hmachhawn leh ang.
Australian Open champion Sabalenka hian last 16 inkhel dangah 7-6 (7-5) 6-4-in Stephens a hneh a, a career-a a vawikhatna atan French Open quarter-final a lut.
Kumin January thla mai khan Belarusian hian Melbourne khuaah a major title hmasaber a hlawhchhuak a, unseeded American hneh chungin Paris-ah a dai ngai loh ram a thleng leh ta phawt a; last eight lama a tum leh tur Ukranian nu hi US Open champion hlui leh Paris clay-a 2018 final lo khel ve tawh Stephens aiin khawng hret tura ngaih a ni a, indo boruak lo awm bawk nen world number two hian Roland Garros-a a last four hmasaber tur hi a thleng zo dawn em a chiang rih lo.
Sabalenka hi Paris-a a chak hmasak pahnihah news confe-rence laiin Ukrainian reporter pakhat chuan Belarus thlawpnaa Russia-in Ukraine a run chung-changah a chhaihbuai a, a thil tawn avang khan Pathiannia hnehna a chan hnuah open news conference hmachhawn a duh ta lo a, a dinhmun chu him loa a ngaih thu sawi chungin reporter-te hual tuau tuau theih lohin zawhna leh a duh zawng inkharkhip chunga media hmaa chhuah leh tura sawichhuah a thlang ta zawk a ni.
Pathianni last 16 inkhel dangah 2021 French Open runner-up Russian Anastasia Pavlyuchenkova pawhin set khatna hloh zet chungin Belgian 28th seed Elise Mertens chu 3-6 7-6 (7-3) 6-3-in a hneh.
Khup hliam avanga nikuma thla nga zet chawl Pavlyuchenkova hi WTA ranking lamah pawh 333-na daih ni tawhin, Paris-ah a nihna a rawn pholang leh tan mek a, quarter-final match pakhatah tunhma lama Roland Garros-a third round la pel zo ngai lo Czech Karolina Muchova a hmachhawn ang.
Muchova hian Court Suzanne-Lenglen lama round of 16 match pakhatah 6-4 6-3-in Russian lucky loser Elina Avanesyan a hneh.