Zobiakvela (Masena)
Tunhma lam atang tawhin ram hruaitute kan sitna leh duh thawhna lamah, “Kei chu ni ve ila…” kan ti fo a! Thil tha tam tak tih tur kan sawi a, a tih dan pawh hriain kan inngai a, zei dawn hlê ni te’n kan insawi a, kan inzuar bawk a; tihhlawhtlin duak duak theih kan inbeisei thin.
Tuna Mizoram sorkar dinhmun hi en ila, a chîk peih deuh tan chuan nuih tet tetna tur a awm a awm nual tawh! An Minister pakhat phei chuan pawn lama an lo sawi thin dan leh a chhûngah chuan a lo inang lo hle tih a sawi!!
Pa pakhat in dang thar, hawihai zet te pawh kan ang thei rum rum a. Chi bûr dahna thlengin ngaihtuah a lo ngai tawh a! Têl, Chini, Aieng, Ajinomota ilo fahran, Ration buhfai khulhna, electric bill pêk ngai, ram chhiah, fate sikul fee nen; chûng zawng zawng dap kim vek ngai nih inhriat hi, hunin a hrilhfiah chawp kher kan nih chuan hma a sâwn theih ngai loh vang.
Ni e, ram hruaitute’n an insawi anga thil an ti leh si lo nia kan hriat hian kan sit a, tawngkam hriam tak tak hmangin kan sêl a, thahnemngaihna phei chu a ni vek mai thei e.
Chutih rual chuan khawtlang leh kohhrana kan hruaitute pawh hetiang tho hian kan ti a, kan duh tâwk lohna te kan sawi nasa thei hle. Pastor thenkhat ram hruaitute tlawn chîng, an in leh a vêla hmuh tur awm fo nih te hi a him lo thei hle ang em le?
Sorkar kal tawh, a chhe thei ang bera kan han chhuah mai thin te hi ka ngaihtuah let ve ta fo va. Thil hi kan chîk lem lo tih hi, a Mizo mipui nâwlpui ang hian a chiang khat hlein ka hria. Sorkar kal tawh te thil tha tih sawi duh miah lo, engemaw kan han ti tan ve dawn a, ha-hîpa infak nghal mai hi chu a zialo lam deuh. Mi te’n min fak hun leh kan thil tih chu tha an tih thu hi sawi zawk se la, a mawi ang a, a tlo zawk bawk ang.
Chief Minister hi kan ni luai luai dawn hauh lo a. A ni teuh thei deuh MLA leh Minister zingah pawh hian ni lo tur an tam zawk daih a. Chuvangin, lal ber kan nih ve theihna hmun kan chhungkuaah chuan Chief Minister chu ka ni ve tihna a ni mai a. Chhungkua ka enkawl dan leh kaihhruai dan hi a tha tâwk em le? tih hi inenlet nan hmang theuh thei ila.
Mi fate kut vûng ber bûr, ke vûng ber bûr… kan ti chiam dawn a nih pawhin, chutiang sawi thei dinhmunah chuan ka ding em? Engnge ka fate an án? tih hi chhût ngam hmasak a ngai khawp mai!
Nia, ka hnathawhna hmunah hian hotu chan ka chang ve a, ka nau te, ka thawhpuite ka enkawl dan hi a lungawithlâk em? Thawktu tha lo chu hrem thei, chawpchilha bân hial thei, a tûk atanga mi thar la nghal thei ka ni mai thei a.
Mahse, ka ti tha tâwk em? Ka naute chu ka chungah an lungawi em? An thla a muang em? Principal/ Headmaster te hi kan thawhna hmunah hian Chief Minister chu kan ni mai a, kan thawk tha tawk em le?
Aw le, Chief Minister nih hautak tur zia hi ka ngaihtuah thiam chiah lo zâwk a. Mipuiin kan beisei dan, sorkar laipui dawr dan, sorkar hnathawk, (an huat thu suhah) mahni hmasial tak tak, fing thiam tak tak, lehlamah Tuikuk leh Chakma chungchang, ramri buai, thil man sâng, chhiah, dan thar siam zawng zawng, politics lama an mite pangchanna leh eptute’n thu dik lo hmanga vau titiha an nawr vel thin dan te, tlawmngai pawl leh pawl dangte duh dante nen, taksa leh rilru hrisel neih, taimak a ngai dawn mang e aw, ka ti thin.
Chûng thil chu, Pu Ch. Chhunga, Brig. T. Sailo, Pu Laldenga, Pu Lal Thanhawla leh Pu Zoramthanga te chuan an lo paltlang vek tawh a. An ngaihsanawm a sin. An hun lai khan tute emaw mawhchhiat reng rengin lal thutthleng kha an thut lo va, chutiang atan chuan hun an hmang lem lo!
Mihring ve ta chu nawmsam loh deuh te, chaw ei tui loh, mut tui loh, rilru hah leh thinrim lai, an chenpuite leh laina dangte avanga mangan ve viau laite pawh an nei ve ngei ang a. Damloh leh lusûn thlengin.
Kan bawr buai dan leh kan duh dan thlen zozaite ringawt pawh hi chauhpui tham ni hialin ka hre thin a, a lâk zângkhai dan riau, shortcut mak deuh an hria a nih loh chuan thaupui chi, mum tul tulna tur ni lo-in ka hria!
Chief Minister chu lo ni ve ta tehreng ila, ‘populist step’ an tih ang chi, mipui hmuia chithlum tah, a tawpna tha si lo, chawpchilha intihlawm tumna hi ka kal dan tur a nih ka ring lo a.
Ka thil tih chu a rah hmuh hman a nih a, min duh zui ta phian a nih leh thu dang ni se, rah chhuah hman ting si lo, mipui ti thinrim tâwk vel lek, harsatna a lo thlena mawh la ngam lo, hma-tâwng ngam chuang si lo, puh tur dap mi, zuzi taka ram hruai chu ka tum hauh lo thung ang.