Football-ah defender tha sawi apianga sawi hmaih thiang lo tluk, ball tiam leh fing Giorgio Chiellini chuan Thawhlehni zan khan inkhelh a chawlhsan thu a puang a. Kum 32 chhung zet nuam ti taka hun a lo hman tawhna professional football kalsanin, a ballboot a khai fel ve ta.
Defender lar Chiellini hian kum 2000 khan Italian club Livorno-ah a professional career bul a tan a, vawi riat lek a khel hman tihin Roma in an la lut. Roma atang hian a club hlui lamah loan in a kir leh zet a. Kum 2004 khan a larchhuahna hmun Juventus a pan. Juventus tan hian a vul chho hle a, inelna hrang hrangah vawi 561 khelin, Serie A title pakua ngawt a lakpui a. Coppa Italia-ah vawi nga a champion pui bakah kum 2015 leh kum 2017 te khan Champions League final a thlenpui bawk. UCL ah erawh a champion ta lo. A kum a upat deuh tak hnuin Juventus a chhuahsan a, Fiorentina-ah loan in a khel a. Hemi hnu hian football a chawlhsanna hmun Los Angeles FC a zawm zui leh.
Chiellini hian kum 2004 atangin Italy tan a khel tan. Italy tan hian inelna hrang hrangah vawi 117 a khel a, goal 8 a thun a. Euro 2020 ah a champion pui.
Chiellini-a’n a ballboot a khai
