Mizoram State Commission for Protection of Child Rights (MSCPCR) chuan naupang kumtling lo hnathawka chhawr/ chhawr luih (child labour) chungchangah state sawrkarin dan tha tak a neihna turin hma lak mek a ni tih an sawi.
Hetihlai hian MSCPCR-in naupang chunga pawikhawihna case a buaipui zingah The Juvenile Justice (Care & Protection of Children) Act 2015 bawhchhiatna a tam ber a; The Right of Children to Free and Compulsory Education (RTE) Act 2009 leh The Protection of Children from Sexual Offences (POCSO) Act 2012 ten an dawt.
MSCPCR chairman thar Jimmy Laltlanmawia hoin member-te leh official-te chuan Thawhlehni khan thuthar thehdarhtute an kawm a. Commission hmalak mekna, Aizawl leh a chhehvelah child labour an awm leh awm loh enfiahnaah mi paruk an hmuchhuak a, Manipur atanga sahimna zawnga Mizorama rawn tlanlut vek niin, motor workshop-a thawk an ni tih an sawi.
Child labour chungchangah Mizoram sawrkarin State Advisory Committee a la nei loa, LESDE department nen hma la in, child labour chungchangah rules tha tak nei turin hma lak mek a ni tih an sawi.
POCSO hnuaia naupang vanduaina tawkten zangnadawmna an dawn theih chu pending a lo tam tawh a, hetah hian hma an la mek tih an sawi bawk.
Naupang tawrhna thlengah chuan an hriat ve leh hma an la nghal zel dawn tih sawiin, tunhnaia Bawngkawna naupang chunga thil thlengah pawh khawtlang hruaitute an biakpawh bakah police hmalakna an enzui zel tih an sawi a ni.
Tunhnaiah RTE Act bawhchhiatna ang chi, school-a naupang hremna thleng a awm zauh zauh a, hei pawh insawifiah tura koh an ni tawh tih an sawi bawk.
2018 kumtir lama Mizoram State Commission for Protection of Child Rights a din hnu ah, kumin August kal mek thlenga an chhinchhiah chinah, naupang chunga pawikhawihna case an buaipuiah JJ Act bawhchhiatna 23, POCSO Act bawhchhiatna 12, RTE Act bawhchhiatna 6 a awm tawh a ni.
Child labour-ah dan siam tum mek JJ Act leh RTE Act bawhchhe tam
