Children’s Science Congress zo

Science Teachers Association Mizoram (STAM) leh Samagra Shiksha Mizoram buatsaih State Level Children’s Science Congress vawi 31-na chu October 18 & 19 khan neih a ni.
District 11 atangin science project 41 hmangin intihsiak a ni a. Focal theme atan “Understanding Ecosystem for Health and Well-being” tih hman a ni. Science project intihsiakna hi IIT Gandhi Nagar assistant professor Dr Krista Roluahpuia, ICMR-NARI, MZU scientist B Dr Rita Zomuanpuii leh PU College assistant professor Dr K Vanlaldinpuia ten an endik.
A harna hmanpuitu PUC principal Prof. H Lalthanzara chuan, technical leh science general huang zirnaah zirlai tam tak hlawhtlinna changte chu direct emaw indirect taka STAM zar zotu nia a hriat thu a sawi a. Mi hlawhtling ni turin school tha ber bera kal kher a ngai loa, tuna an school kalna theuh ngainep loa, taima leh chhel, teirei peih apiang an hlawhtling thin tih hrereng turin a fuih.
Kumin theme chu a ngaipawimawh tih sawiin, “Tunhnaiah kan rama kawng siamten environment an tichhe nasa a, kawng laihna leivung an hnawl thla tawp a, chu chuan leimin a siam a, luiah luanglutin leinawi inchhilhkhawm (siltation) in luia cheng nungchate khawvel (aquatic environment) a tichhe nasa a, chu chuan luia eizawngte thlengin a nghawng a ni,” a ti. Kan lui tui (river ecosystem) chhe zel venghim leh chhanhim turin mawhphurhna kan nei, tiin, mahni theihna kawngah tan la zel turin a sawm a ni.
Child scientist-te tan “Meet the Scientist” hun hman a ni a, MZU Zoology department ami Prof. HT Lalremsanga nen inkawmna hun buatsaih a ni.
Kumin December 27-31 chhunga National Children’s Science Congress-a kal tur te leh kumthar January thlatira Indian Science Congress a kal turin project 10 thlan an ni. Project neitute chu – Deborah Lalnunchami, Don Bosco School Lawngtlai; H Zarzothanga, Govt. Middle School-II, Khawzawl; Lalremtluangi Ralte, Govt. Bethlehem Vengthlang H/S; Mercy Lalawmpuii, Synod HSS; Lalrotluangi, Govt. Pangzawl H/S Hnahthial district; Sarah Lalrinkimi, Govt. HT High School, Tumpui Kolasib; Lalhmangaihsangi, Govt. Saitual High School; J Malsawmzuali, Bethel Mission School Champhai; Tiffany Zomuanpuii, Modern English HSS Aizawl; Hannah Lyno, New Light School Tipa, Siaha district an ni.