China-ah taekwondo zir zawm dawn
Beijing China-a taekwondo leh Bachelor of Arts (BA) zir tura thlan mi pahnih – Vanlalhmangaihzuali d/o Lalrinawma, Kolasib New Diakkawn leh Joseph Vanlalpeka s/o Lalremruata (L), Armed Veng South chu Sports & Youth Services minister Lalnghinglova Hmar chuan Thawhlehni khan anmahni fuih pahin thlahna a buatsaih.
Mizoram sports-in hma a sawn zel theihnan sports association hruaitute leh infiammiten national level leh international level thleng phaka ngaihtuahna sen a tul tih Sports minister hian a sawi a. Taekwondo chu international level-a medal hnaih theihna sports discipline zingah a tel tih sawiin, Vanlalhmangaihzuali leh Joseph Vanlalpeka te chu an university leh China-ah Mizo aiawhtu leh Mizoram hmel lanna an nih dawn avangin an zirna leh nitin nunphungah Mizo nun zemawi vawng zel turin a chah. Tawng, hriselna leh zirna chungchangah harsatna an tawh chang pawhin an kal chhan hrereng a, hlawhtlin ngei tuma thawkrim turin a fuih bawk.
Vanlalhmangaihzuali leh Joseph Vanlalpeka te zirna tur hi Capital University of Physical Education & Sports, Beijing China niin, foreign sponsorship quota-a lut tur an ni. Kumin June 13-14 chhunga Aizawla Mizoram Sports Conclave buatsaih a nih tuma lokal, Grand Master Kim Hee do leh Grand Master Lee Jeong Hee ten Mizoram Olympic 2036 Vision a hlawhtlinna turin sponsorship hi an buaipui a ni.
He sports university-a sponsorship hmua lut thei tur hian grand master-ten tehfung chi hrang hrang hmangin an endik a. Hemi paltlang hnuah India atangin Vanlalhmangaihi leh Joseph Vanlalpeka te chu zir thei tura thlan an ni ta a ni. University-ah hian China zirlaite kalphung ang thoin kum khat chhung chu China tawng (Mandarin) zir pahin, Taekwondo zirtirna an kalpui ang. Kum khat hnuah hian Bachelor of Arts an zir chhunzawm nghal dawn a ni.
Mizo Taekwondo player pahnih hi national level-a an category-a champion lai ve ve an ni.
China-ah taekwondo zir zawm dawn
