US intelligence te chuan kar kalta Inrinnia Chinese balloon an kahthlak chu Chinese military tena spy-na atana an hman tiin an sawi.
Heng balloon te hi ram dangte thil leh hmun pawimawhte lakkhawm nana hman thin a ni tiin official pakhat chuan Washington Post hnenah a sawi a. China hian Japan, India, Taiwan leh Philippines lakah pawh a hmang tawh an ti bawk. Mahse, Chinese officials te chuan inenthlak nana hman a ni lo an ti ve thung.
US officials te chuan heng balloon te hi southrn Chinese island leh naval military base Hainan atanga thlawk chhuak niin an sawi a.
He balloon hi Hainan atanga People’s Liberation Army tena vansang atanga enthlakna an kalpui zinga tel tiin US intelligence community te chuan an sawi a.
Thawhtanni khan US chuan ram hrang hrang 40 te hnenah inenthlakna lama hmalakna a awm tiin Biden administration a hrilh niin CBS News chuan a sawi bawk.
US Deputy Secretary of State Wendy Sherman chuan he balloon hian kum 2019 khan khawvel lo fang tawhin Hawaii leh Florida pawh a lo hrut tawh a ti bawk a.
Biden sorkar official te chuan national intelligence kaihhnawiha mawhphurtu ber US Congressional leader tlemte awmna Gang of Eight te chuan sawihona an nei dawn a ti bawk.
Kar kalta khan Pentagon chuan Chinese spy balloon dang te pawh Costa Rica leh Venezuela ah te pawh hmuh an nih thu a sawi a. Heng balloon te avang hian US leh China inkar chuan a chhiat phah hle a ni.
US Secretary of State Antony Blinken chuan Beijing tlawh a tum a thulh phah thak a, chuti ni lo se ram pahnih hruaitute kum hnih hnua an inhmuh hmasak ber tur a ni.