China hruaitu hlui Li Keqiang thlah liam Hmun tinah National flag a ngul chanvea zar niin China chuan an premier ni \hin Li Keqiang an thlah

October 27-a heart attack vanga thi Li ruang chu Shanghai atangin Beijing-ah phurh luh niin phum a ni.
Amah thlahtu mi tam tak pungkhawmin chutih laiin China sorkar chuan a uksak tawk lo hlea ngaih a ni thung.
Kum 68-a upa Li kha China future leader tia sawi thin a ni a. Mahse, rang takin Xi Jinping chuan lehpelin chumi hnuah Xi chuan a thuneihna chu nghet tawka sawh nghetin kum 10 vel zet rorelna a lekkawh tawh a ni.
Kar kalta khan China Communist Party chuan Li chu ‘time-tested communist soldiers’ tiin amah uina ziakin mipuite chu ‘an lungngaihna te chaknaa chantir’ a hruaitu ni mek Xi thlawp turin a ngen bawk.
Li thlah liamna hi Baboshan Revolutionary Cemetery-ah neih niin amah thlah liamtute zingah Xi leh a nupui peng Liyuan te pawh an tel a. Premier thar Li Qiang mai bakah Politburo Standing Committee member te pawh an tel a ni.
China mipuite chuan Li hi an ui hle a, amah uina tam tak ziahlan leh pholanin a awm mek a. Rorelna a chan lai pawha roreltu chak leh rorel thiam anga ngaih niin China tan channa nasa tak tih a ni bawk.
“Li uina nasa taka lantir a nihna chhan hi Chinese mipui tam tak te chuan inhawng zawk leh beiseina sang zawk neihna phumna nen an ngai a ni. Tunah chuan Xi hnuaiah China chu authoritarian zawkin a kal mek a ni,” tiin Neil Thomas, fellow for CHinese Politics, Asia Society Policy Institute chuan a sawi.
Office a chhuahsan atanga hun rei lo te hnu leka a thih zui mai avangin Li uina chu a zualkai bawk tia sawi a ni bawk a.
Li khan kumin March thla thleng khan kum sawm vel China premier nihna a chelh a. Economist niin kum 28 mi lek a nihin Chinese elite politics a luhchilh a, China provincial governor naupang ber ni thei a ni bawk. Party-a sang tak a thleng vat thei chu a danglamna niin power base pawh nei lo Chinese leader tam tak te an pate thiltih theih avanga dinhmun tha chelh ho ‘princeling’ an tih mai zinga mi a ni ve lo bawk. China hotu lu ber ni mek Xi Jinping hi chu a pa Xi ZHongxun pawh China State Council a secretary-general hmasa ber a ni bawk.
Li kha a economic policy kalpuiah pawh ngaihdan hmanga kal aiin a taka finfiah hnua kal duh zawk thin a ni a, rethei leh hausate inkar tihzim leh chenna nghet pek te chu a ngaih pawimawh a ni a. Mahse, Xi Jinping hnuaiah reofrms a kalpui tak tak thei lo va, chuvang chuan foreign business te pawhin China-a tuilohna an neih phah bawk.
China ram pawnah chuan Li chu ‘Li Keqiang index’ tih avanga lar em em niin he thu hi The Economist te phuahsak niin China economic growth dik tak sawi nana hman a ni a. Li khan US official te nena an inkawmnaah China ross domestic figure te chu ‘man-made’ tia a sawi vang a ni.
Kyle Jaros, professor on global affairs, University of Notre Dame chuan Chinese mipui te chuan Li an hnaih hle a, a chhan ber pawh domestic issues a ngaih pawimawh vang a ni tiin a sawi bawk.
Kumin March thlaa China Cabinet State Council atanga a ban dawn pawh khan mi tam takin a thusawi inziahna kengin an thlah a. Chung zingah chuan, “Van khian mihring te thil tih a enthla reng a. Van khian mit a nei a ni,” tih chu a tel.
Li hi tuna premier ni mek Xi Jiping an a thlan loh leh duhsakna chang lo chhuahsantu hnuhnung ber a ni a. Li chhuahna tih mai thiltithei tak Youth League chu thiah a nihna kawngah Xi chuan Li hi a hnawl a ni. Li mai bakah vice premier hlui Wang yang te chu party top-decision making body atangin tum hnih a petchhuak a ni.
Xi-a’n a thlak tak Hu Jintao pawh bang tura an tih tum Communist Party Congress a chhuahsan dawnin kal pahin kum 80-a upa Hu chuan a thuihruai nia ngaih Li chu room a chhuahsan hmain a darah a beng thak thak a. Mi tam tak te chuan mipui mimir hmuh theiha Hu hnawhchhuah chu Xi ana thuneihna a sawhnghehzia lantirna an ti bawk.