Chinese leader Xi Jinping chuan Vietnam tlawhin Southeast Asian ram nen inzawmna ngelnghet zawk neih a duh a. A hma lawkin Xi chuan khawthlang ram te nen inzawmna tha zawk a siam bawk.
Kum 2017 hnua Vietnam a tlawh leh hmasak ber niin Communist Party General Secretary Nguyen Phu Trong, President Vo Van Thuong leh Prime Minister Pham Minh Chinh te a hmu dawn niin Vietnam’s Foreign Ministry thuchhuah chuan a tarlang a.
Chinese leader hi red carpet nena lo lawm niin airport-ah pawh Chinese leh Vietnamese nationals te an pungkhawm a, Xi leh a nupui Peng Liyuan te lo lawm nan hian Chinese leh Vietnamese flag te chu lo vaia lawmin an awm a ni.
China leh Vietnam-te hian kum 15 chhung chu ‘comprehensive strategic partner’ kalpui tawhin chu chu diplomatic relation lama official designation sang ber a ni. Vietnam hi Southeast Asia economy leh security a pawimawh em em a ni bawk a.
Ideology tak pawhin Vietnam chu Beijing nena inhnimhnai an ni a. Communist Party te enkawl ve ve niin mahse tun hnaiah erawh Vietnam chuan Western ram te a hnimhnai hle thung.
September thla khan US President Joe Biden chuan Vietnam tlawhin China nena an inlaichinna ang dinhmun sang ber tho US pawh pek a ni a. Biden chuan Vietnam leh US inzawmna sang tak chu China beihna a ni lo tiin a sawi a. Mahse, US diplomacy kalpui chuan Asia leh Pacific ram te nena inzawmna ngelnghet siam a ni bur thung a, chu chu China influence awm thei zel danna tur tia ngaih a ni.
November thla khan Japan leh Vietnam pawhin economic leh security lama thawh dunna siamin ‘free and open Indo-Pacific’ tih chu thupuiah neiin Japan pawh China leh US te nena diplomacy a dinhmun sang ber tho pek a ni a. Japan chu Vietnam nena inlaichinna nei tha em em niin foreign investor lian ber pathumna a ni bawk.
Vietnam hi South China Sea inchuhnaa China nena intibuai ram zinga pakhat a ni a, a bik takin archipelago pahnih Spratlys leh Paracel Islands chungchangah a ni bik a. Tun hma deuh pawhin tuipui inchuh hian China coast guard te a lo um tawh a, mahse, Vietnam hian a chet lak dan chu mipui hriatah a pholang ngai lem lo.
October thla khan Xi chuan Vietnamese president hnenah ram pahnih te chuan ‘traditional frienship’ an neih chu khawvel inthlak thleng zelah pawh an kalpui nghet tlat tur a ni tiin a lo sawi tawh bawk a.
Ram pahnih hruaitute chuan China Belt and Road Forum-ah inhmuhna neiin Vietnam chuan Beijing nen infrastructure agreements an ziak ngei dawna sawi a ni bawk.
China hi Vietnam-in a sumdawnpui lian ber niin ram pahnih sumdawntawnna chuan kum 2022 khan $175.6 billion a hawlh dawrh a. Trade deficit thuah erawh China dinhmun a tha zawk thung.
China hian Vietnam-ah active project 4,000 chuang neiin $26 billion vel investment a kalpui tawh a, Vietnam-a infrastructure project kalpui hnem ber a ni mek bawk.
China hruaitu Xi Jinping-an Vietnam tlawh
