China-in India nena ramri hnaih tak, Tibetan Plateau-a Yarlung Tsangpo luia tuikhuah lian tak siam tura hna a tan hnuah India pawhin a tuikhuah sang ber tur, Dibang Multipurpose Project chu Arunachal Pradesh-ah a thawk ve tan ta.
Indian sorkar chuan sorkar hnuaia mi, NHPC Limited chu he tuikhuah siam tura thlangin Rs. vaibelchhe 17,069 senna tur niin China-in a tuikhuah atanga tui a sah thut lo danga India-a tui lian a thlen theih venna tur a ni.
Thla 91 chhunga siam zawh tura ruahman niin Dibang dam hi kum 2032-ah chuan peih hman vek a ni ang a, India tan ram venhimna pawimawh tak a ni tel dawn a ni.
Arunachal Pradesh Chief Minister Pema Khandu chuan tun hnai khan Minli khuaa hna tan hi a en a, a nikum khan Prime Minister Narendra Modi-a’n 2880-MW Dibang Multipurpose Project thawh tan tur lung a phum bawk.
Hmanhmawh taka India-in hna a tan chhan hi July thlaa China-in Tibet-ah khawvela hydropower dam lian ber siam hna a tan tih a darh vang a ni a. India hian tuikhuah lian chungchang hi China pawh sawipui nghalin Beijing chu India tana harsatna thleng lo tura hma la turin a a ti.
Kum 2020-a Galwan-a ram pahnih sipaite an intihbuai hnuah ram pahnih inkar hi a tha leh tan mek a, Modi-a pawhin thla hmasa khan SCO Summit-ah telin China a tlawh a, President Xi Jinping-a nen pawh an inkawm a; mahse, hemi tum hian tuikhuah hi an sawi dun chiah lo nia hriat a ni.
Arunachal Pradesh Chief Minister Khandu-a chuan a hma khan tuikhuah hian Siang leh Brahmaputra a tikangchat thei dawn tih sawiin Chinese tuikhuah atanga tui sah a nih chuan India tan ‘water bomb’ a ni thei dawn tih a lo sawi tawh bawk.
Siang River hi Tibet-ah hnar neiin Yarlung Tsangpo an ti a. Arunachal Pradesh lutin Dibang River nena an inpawh hnuah Brahmaputra nen an infin leh a ni.
Dibang Multipurpose Project hi kawlphetha siamna leh tui lian venna tur a ni tih NHPC Limited-in hna thawh tur an chhannaah an tar lang a. Lower Dibang Valley district-ah khuah a ni dawn.
Khandu chuan NHPC Chairman & Managing Director Sanjay Kumar Singh-a nen tun hnaiah a hmun hi an en a. Kum 2032-a zawh hman tur a nih thu a sawi.
Metre 278-a sang tur niin India-a tuikhuah sang ber tur a ni a, kum tin kawlphetha unit maktaduai 11,223 suam chuak thei tur a ni dawn a ni.
Dibang River hi Brahmaputra River system-a a peng pawimawh tak niin Brahmaputra-a tui 7% hi a tum a ni a. Himalaya bulthut, Tibet ramria hnar nei niin hmar atanga chhim zawngin Dibang Valley district luang tlangin Lohit nen Sadiya, Assam-ah an infin a. Km 195-a sei niin project hi thawh zawh hunah chuan Arunachal Pradesh hian kum tin Rs. vaibelchhe 700 man kawlphetha a thlawnin a dawng dawn a ni.
Tuikhuahah hian tui cubic metre 1,282 a danwg dawn a, fur lai pawha tui tling luang liam lo tura chhut a ni.
China-in hna a tan hnuah India pawhin AP-ah tuikhuah hna tan nghal
