Chinese military-te chuan ‘inlakhran tum leh foreign forces’ te tia sawiin vauna chhakchhuakin Taiwan leh a chhehvelah sipai nunchan zirna an nei zui nghal tiin Defence Ministry thuchhuak chuan a tarlang a. Hei hi Taiwan vice president zinin US a tlawh vang a ni.
Taiwanese Vice president William lai chuan South America a diplomacy lama inzawmna an neihpui awm chhun Paraguay a tlawh hawna lamah San Francisco leh New York City-ah a chawl a. Hei hi China chuan a duh lo takzet a ni. China mainland ruling Communist Party te chuan democratic Taiwan chu an territory anga an ngaih niin ram dang nena inlaichinna an siam theih a ni lo an ti bur a ni.
China Eastern Theatre Command thupuangtu chuan thuchhuah a siamah tuna sipai nunchan zirna an neihah indo lawng lian leh indo thlawhnate chu hman an nih thu a sawi a.
Indona hmuna an theihna hrang hrang tur te lantirna neih a ni tiin Shi Yi chuan a sawi a, sipai nunchan zirna chu Taiwan hmar leh chhim thlang lama tuipui leh van boruakah an neih thu a sawi a. Heng lai hmun hi pro-Taiwan independence forces te leh foreign forces te huangtau deuhna tiin a sawi bawk.
State media CCTV pawhin sipai nunchan zirnaah hian missile a thuam lawng leh fighter jets te chu hman a nih thu sawiin Taiwan hualin indo nunchan zirna neih a ni, a ti.
Taiwan Defence Ministry chuan social media platform C ah an siapite chuan an thliarkar hnaiah Chinese military aircraft 45 leh indo lawng pakua an hmuh thu a sawi a. Indo thlawhna 27 lai an zinga Su-30, J-10 leh J-11 fighters te pawh telna chuan Taiwan Strait an pel tiin a sawi a, helai hmun hi Taiwan leh mainland China te unofficial boundary niin buffer zone anga ngaih a ni.
Taiwan chuan chhanlet nan aircraft leh indo lawnglian te chu tirchhuakin hei bakah hian land-based missile system te pawh a tinung bawk tiin ministry chuan a sawi bawk a. China sipaite chetlak dan chu uluk taka an thlithlai thu a sawi bawk.
Hei bakah hian Taiwan ministry chuan thuchhuah dang an siamah China chetlak dan chu an dem thu sawiin Chinese army te hmachhawn turin sipaite inralringa an awm reng thu sawiin ram humhim tura theihna an neih thu a puang zui bawk.
Taiwan leh China hi kum 1949 a Chinese civil war chhuah atanga inthen hrang niin Communist Party te chuan Mainland China an thunun a. Taiwan hi People’s Republic of China-ah a la awm ngai lo hrim hrim a, mahse, Beijing chuan Taiwan chu a ram bung inla hrang angah ngai tlatin a tul chuan tharum hmanga lak mai tur tiin a sawi ve reng thung.
China chuan Taiwan Vice President Lai an Paraguay a panna lama US tlawha US official te nena inhmuhna an neih chu an duhloh atzket thu sawiin Lai hian ‘Taiwan independence’ chungchang bak sawi a nei lo an ti bawk a. Ahma pawhin Lai chu ‘buaina siamtu Taiwan indo dinhmun derthawng taka dah thei tu’ tiin China chuan a lo sawi tawh bawk.
Taiwan hian kum 2024 ah presidential election nei dawninin Lai chu an party candidate tur a ni dawn bawk a. Taiwanese Presidential Office spokesperson Olivia Lin chuan China chu tun atanga renga kum 2024 January thlaa president thlanna neih a tum tihbuai tuma hma la tawh tiin a puh ve thung.
Taiwan’s Foreign Minister, Joseph Wu pawhin China chuan Taiwan inthlanah thuneih tumin hma a la tiin a sawi a. “Kan inthlanah hian kan khua leh tui te thutlukna siam tur a ni a, kan thenawm, midang vau hrat tak te thuneihna a ni lo,” tiin a sawi bawk.
China-in military drill nei
