China-in Belt & Road Initiative-a a flagship program, China-Pakistan Economic Corridor (CPEC) hnuaiah Pakistan leh China chuan economy leh sum thawh tihpun an remti tih thuneituten an sawi.
Chinese Foreign Minister Wang Yi-a chuan Pakistani Foreign Minister Ishaq Dar chu Ningani khan Islamabad-a foreign affairs ministry-ah kawmin CPEC hnuaiah hian huang zauh an remti dun tih Pakistani sorkar chuan a puang.
Ram pahnihten hna thawhna atana sum an thawh zat tur tak erawh an puang lo thung. Chinese-ten ‘One Belt, One Road’ tia an sawi, Belt & Road Initiative hmang hian power plant, kawngpui, rel kawng leh lawngchawlhna hmnunte chu khawvel hmun hrang hrangah siam a ni a. Hei hi China-in Africa, Asia, Latin America leh Mideast ramte a puihna a nih piah lamah thian tha a siamna a ni a. President Xi Jinping-a’n khawvel kal vela Beijing-in huhang na zawk a neih theihna tura a hmathlir a ni.
Beijing hian CPEC hnuaiah hian Pakistan-ah dollar tluklehdingawn tel sum a hmang tawh a, China khawthlang, Xinjiang atanga Pakistan chhimthlang, Gwadar-a Arabian Sea-a lawngchawlhna a intlawhpawh theihna turin kawngpui, power plant leh rel kawng siam hna thawh a ni a. Heng Chinese hmalakna hi tun hnaiah an ram chhunga an inrawlh phal lo hel pawlin an bei fo nghe nghe.
Foreign minister pahnihte hian science, technology, industry leh lo neihna kawngah thuk zawka tanho ni se an ti bawk.
Wang-a chuan Pakistan-a Balochistan province leh hmun danga helhovin Chinese inhlawhfa leh engineer-te an beih fo chu tha lo tiin an himna pe tha turin a ngen a. Islamabad hian tun hnaiah CPEC kaihhnawih hna thawhnaa thawkte venhimna hi a tipung viau tawh nghe nghe.
China hi Pakistan thian tha tak a ni reng a, suma a mangan pawha puitu ber a ni a, Islamabad hian eibarah harsatna a tawk fo thin a ni.
Wang-a hian a hma niin Kabul-ah Afghanistan-a Taliban roreltute kawmin politics leh eibara thawhho theihna turte a sawipui a, Dar-a hi a kawm zui leh a ni.
Afghanistan leh Pakistan a tlawh hma hian Wang-a hian India pawh kartir khan tlawhin sorkar hotu pawimawh leh Prime Minister Narendra Modi-a pawh a kawm a, Asian ram lian pahnihte inkungkaihna tihthat deuh deuh tumin hma an la zel a ni.
China-in Pakistan-a CPEC-ah sum tam zawk pe dawn
