China tuikhuah India tan water bomb ni thei – Khandu

China tuikhuah India tan water bomb ni thei – Khandu
China-in Arunachal Pradesh nena an inrina bul lawka tuikhuah lian tak a siam chu ‘water bomb’ a nih theih thu leh sipai chakna hmanga inbeihna ai maha ngaihtuah ngai leh hlauhawm niin Chief Minister Pema Khandu-a’n a sawi.
PTI Videos-in Thawhlehnia an kawmnaah Khandu hian Tibetan tawnga Brahmaputra an sawina, Yarlung Tsangpo luia khawvela tuikhuah liam ber an siam mek chu China-in international water treaty an zawm ve loh avangin ngaihven ngai tak a nih thu a sawi.
“He thilah hian China hi a rinngam lo va. Eng nge an tih dawn tumahin an hre lo,” tiin Khandu hian PTI headquarters-a an kawmnaah a sawi.
“China atanga sipai hmanga invauna piah lamah he thil hi a la hlauhawm zawkin ka ngai a. Kan hnam leh heng laia khawsakna tibuai thei a ni dawn a, China hian ‘water bomb’ atan a hman theih dawn avangin ngaihtuah ngun a ngai hle,” a ti.
Yarlung Tsangpo dam prokect tia an sawi hi Chinese Premier Li Keqiang-a pawhin siam a nih dawn thu a puan hnu lawk, kum 2021 khan a lo tlawh tawh.
China hian a siam nan US $ tluklehdingawn 137 a ruahman a, kum nga chhunga thawh zawh tur niin kum 2024 khan zawh fel turin an ti nia sawi a ni a. 60,000 MW power pe chhuak thei tur niin khawvela hydropower dam lian ber a ni ang.
China hian international water treaty-ah a hming a ziak em tih Khandu hian a zawt a, a lo ziak a nih chuan inremna angin luia nungcha awmte tan a chhuah thin dawn a ni.
China hian khawvel tui insemna tura inremna a lo ziak ve a nih chuan India tan malsawmna a ni danw tih a sawi a. Brahmaputra lui luanna – Arunachal Pradesh, Assam leh Bangladesh-a nipuia tui lian thin pawh a ziaawm phah dawn tih a sawi.
“Mahse, China hian engmah a ziak lo va, hei tak hi buaina a ni ta a. Tuikhuah hi an siama vawilehkhatah tui hi an chhuah thut a nih chuan Siang chhehvel hi a chhe vek dawn a. A bikin Adi tribe leh anmahni ang chi hian an thil neih, an ram leh an nunna pawh chânin an tuar hle thei dawn a ni,” a ti.
Chief minister hian hetiang thil a thlen theih avang hian India sorkar nena indawrin Arunachal Pradesh sorkar chuan Siang Upper Multipurpose Project a thawk a, hei hi inven nan leh tuia him nan tih a ni tih a sawi.
“China hian hna an thawk tawh a ni thei a, engmah kan hre lo va. Nakin zelah kan Siang leh Brahmaputra luite hi la ro mai thei a ni dawn a ni,” a ti.
India-a projcet kal lai hi thawh zawh a nih chuan tui a mamawh chu a tuikhuah atangin a nei thei dawn niin Khandu-a chuan a sawi a. Nakinah China-in a tui a sah a nih pawhin thunun theih a ni dawn tih a sawi bawk.