Christopher Nolan te nupa Knighthood leh Damehood hlan
Oscar pawh dawng tawh, film hriathlawh tak tak lo siam tawh, director Christopher Nolan leh a nupui, film producer Emma Thomas te chu King Charles III chuan Knighthood leh Damehood chawimawina a hlan a, Britis royal family official social media-ah Sir Christoper Nolan leh Dame Emma Thomas te chawimawina hi an puang nghal bawk a ni.
Knighthood hi British chawimawina sang a ni a, he chawimawina dawng te hi chuan an hming bulah ‘Sir’ tih an dah thei tawh thin a, hetiang chawimawina hi hmeichhe lamah chuan ‘Damehood’ an ti ve thunga, an hming bulah ‘Dame’ an tih ve thung.
Royal family Instagram-ah Sir Christopher Nolan leh a nupui Dame Emma Thomas te hi an tangkapui dawn nena an thlalak tarlan niin a caption-ah, “Vawiin-a chawimawina hlan zawng zawng te kan lawmpui a, an zingah hian film director Christopher Nolan leh film producer Emma Thomas te pawh an tel. An nupa hian film lama an thawh hlawk avanga chawimawi an ni a, an nupaa thawk dunin film hlawhtling tak tak The Dark Knight trilogy leh Oppenheimer te an lo siam tawh a ni,” tiin an tarlang. Chawimawina hi Nilaini kalta khan Buckingham Palace-ah neih a ni.
Nolan chuan King Charles-a’n ‘Oppenheimer’ film a lo en avanga nuam a tih thu sawiin, “Oppenheimer a en ngei thu leh a tuipui viau thu te a sawi a. Kan kutchhuak te min lo hriatpui ve hi a nuam danglam ve a, hei hian kan hmalak lehzelna turah pawh phurna nasa tak min pek belh a ni,” a ti.
Nolan leh a nupui Thomas te hian film hriathlawh tak tak an lo buaipui dun tawh a, ‘The Dark Knigt Trilogy’, ‘Inception’ leh ‘Oppenheimer’ te pawh an nupa kutchhuak niin, Emma Thomas hi British producer zinga Oscar-a Best Picture dawng thei hmasa ber a ni nghe nghe.
Nolan leh Thomas te hi University College London-a intawng niin, cinema siam lama an tuipui dun hle a, 1997-ah inneiin, production company an din a, film hlawhtling tak tak an siam zui ta a ni. An hnalamah chuan tunlai hian film thar, Hollywood star rual Tom Holland, Matt Damon, Zendaya, Anne Hathaway, Charlize Theron, Robert Pattinson leh Lupita Nyongo te channa an buaipui leh mek a, July ni 17, 2026-a tlangzarh tur a ni.
Christopher Nolan te nupa Knighthood leh Damehood hlan
