CIC-in Serchhip district tlawh
“RTI dilna tih khawtlai loh tur”
Langtlang sawrkar neihna tur leh Right to Information (RTI) Act kalpui kawnga hmalakna peng pakhat atan chief information commissioner of India Heeralal Samariya chuan Mizoram a rawn tlawh a. Thawhlehni khan Serchhip district tlawhin, SPIO leh SAPIO zawng zawng thutkhawm puiin, RTI dilna tihkhawtlai a nih loh nan thawk ho tha turin a chah.
Serchhip district-a RTI kalpui dan thlirlet a ni a. Danin a phut anga RTI zawhna a hun taka chhanna pek a nih theihna’na hma an lak dan leh harsatna an tawh sutkian dan tur ngaihtuah a ni. CIC chuan sawrkar hnathawh danah langtlang taka thil tih a pawimawh, tiin, mipuiin thil thleng engkim hre turin dikna an nei a, an dikna chanvo an chan theihnan SPIO leh SAPIO mawhphurhna a sang tih a sawi a ni
CIC chuan officer-te chu vantlang mipui zinga RTI zirtirna kawngah hma la uar turin a chah a. RTI chhanna tihkhawtlaia a awm lohnan sawrkar department hrang hrang thawhhona leh inpawhna tha zawk neih a tul tih a sawi. “Right to Information Act hi mipui sawrkar siamna hmanraw pawimawh tak a ni a, official-ten hei hi kan hriat a, dan leh inkaihhruaina uluk taka kan zawm a tul,” a ti.
State chief information commissioner John Neihlaia pawhin mawhphurhna nei thuneihna hmangtu chuan a thil tihah mawh a la ngam tur a ni a, accountabilty leh transparency a awm chuan corruption a tlem dawn tih a sawi. RTI hmang tangkaitu tur chu mipui an ni a. Mamawh nei an awm chuan thawktuten tha taka lo tih sak a tul a, hun tiam chhunga chhan ngei thin a ngai tih a sawi a ni.
Hemi hnu hian zawhna awmte chhan a ni.
CIC-in Serchhip district tlawh “RTI dilna tih khawtlai loh tur”
