Pennsylvania a cheng Zach Swope, kum 32, chuan kum khat (thla 12) chhungin cinema hall-ah cinema vawi 777 a en tehreng a, khawvela kum khata cinema en hrat ber record a siam tih Guinness World Records-in an puang. A hmaa hetiang record chu kum khatah cinema vawi 715 en a ni a, he record hi a rawn khum ta a ni.
Asperger’s syndrome nei Zach Swope hian July ni 5, 2022 khan ‘Minions: The Rise of Gru’ enin record siam tumin bul a tan a, heta tang hian ni khatah a tam thei ang ber cinema en zel tumin tan a la ta a ni. Hetiang record siam a tumna hian chhan pahnih a nei a, a pakhat zawk chu nun beidawnna avanga mahni intihhlum te pawh lo tum tawh a ni a, chutiang rilru lo pu ve tawh ten nun hlimawm zawk an la nei leh thei tih an hriat nana record siam duhna leh autism lama mipuiin awareness an neih lehzual theih nana a tih niin a sawi.
Zach Swope hi full-time job nei a ni a, chuvangin a cinema en theih hun tura insiam rem a, nitin vawi thum tal cinema a en ziah a, chawlhkar tawp (weekend)-ah chuan chawlh a neih chhungin a tam thei ang ber en a tum thin. Hetihrual hian film sei lo deuh te pawh a thlang thin niin a sawi a, kar khatah vawi 17 vel tal en ngei ngei tumin a inbuatsaih thin a ni.
Guinness-in hetiang record siam tura guideline an neihah chuan cinema en reng reng chu a bul atanga a tawp thlenga en ngei ngei a ngai a, cinema en chhungin thildang tihpah a rem lo va, mutthluk pawh a theih loh. Film a chhuah lai chuan phone lo bih ngur ngur te pawh khap a ni a, film en laia thil ei leh in pawh phal a ni lo. Hetiang dan hi a zawm tha em tih cinema hall-a thawktu ten an endik reng thin a ni.
Swope hian a film en ngun ber chu ‘Puss in Boots: The Last Wish’ tih kha niin, vawi 47 a en nawn hman a, kumin June ni 2 khan ‘Spider-Man: Acress the Spider Verse’ enin, vawi 716 a en tliang chiah a, record hmasa, French pa Vincent Krohn-a siam chu a khum chiah a, duhtawk mai lovin a chhunzawm ta zel a ni. A tirah chuan vawi 800 en hman a tum a, mahse, hei hi chu a puitlin thei ta lo a ni.
Cinema en hrat ber record siam
