March 14, Zirtawpni zan khan English Premier League khelh chhunzawm a ni a, top 4 huangah let leh thei tura chak mamawh Manchester City chuan an mualah hnehna an chang zo lo. An mualah City chak zo lo mah se Erling Haaland chuan EPL-ah record thar a siam tho thung. City an chak zawh loh lai hian Nottingham Forrest in hnehna an chang a, pathumna an luah nghet ve thung.
City 2-2 Brighton
Table-ah panganaa awm mek Manchester City hian Etihad stadium-ah Brighton & Hove Albion an mikhual. An mikhual lakah goal hnih thun thuai mah se vanduaitlak takin an chak zo lo a, top 4 huangah an kir thei lo.
City hian an mualah bul an tan tha a, inkhel tan atangag minute 11-na lekah penalty an hmu. Penalty hi Erling Braut Haaland chuan a pet goal a, hmahruaina goal a thun. Haaland hian EPL vawi 94 a khel tawh a, goal 84 thunin assist vawi 16 nei tling bawkin goal 100-ah a inrawlh tling der tawh. Haaland hian EPL a goal 100 thawkchhuak turin match 94 chiah a mamawh a, EPL-ah goal 100 thawkchhuak tura game mamawh tlem ber niin record duhawm dang a siam belh.
Hma takah goal thun mah se City an him rei thei bik lo. Goal an chhuah atanga minute 10 hnu lekah Brighton tan Pervis Estupiñán chuan goal thunin an si phurh a sut. Goal khat ve ve an tun hnuin inkhel a hmuhnawm leh zual a, mualneitu City chu che fuh hmasa zawkah an tang nawn leh. Chawlhlawk dawn hnaih minute 39-naah Omar Marmoush chuan hma an hruai nawn lehna goal a thun a. Moarmoush goal thun hmang hian 2-1 a hmahruai chungin chawlhlawk an hmang.
Chawlhlawk hmaa bul tan tha City in second half-ah bul an tan chhia a, an vanduai ve thung. Second half tan atanga minute thumna lekah an rawlthar defender Abdukodir Khusanov chuan an lamah a ti-goal a, Brighton si phurh a sut sak. Minte 48-naah Brighton in an si phurh an sut hnu hian hun tawp thlengin goal dang a luh belh thei tawh lova, Manchester City chuan an mualah uiawm takin hnehna an chang zo lo. An muala chak zo lo City hian khelh 29 atangin point 48 an hmu a, pangana an luah chhunzawm. Brighton hian point 47 hmuin pasarihna an luah ve thung.
Forrest an chak leh ta Inrinni zana inkhel dangah season kal meka khel tha chungchuang Nottingham Forrest chuan Mimualah hnehna an chang a, pathumna an luah nghet.
Forrest hian table hnuai lama awm mek Ipswich Town chu Portman Road-ah an luhkhung a. Anthony Elanga goal hnih bakah Nikola Milenko leh Jota Silva te goal thun hmangin hnehna an chang a. Mualneitu Ipswich Town tan hian Jens Cajuste leh George Hirst ten hun tawp dawn hnaih lamah goal hnih thun bawk mah se tlawm an pumpelh zo ta chuang lo thung. Mimuala chak Forrest hian UCL an hnaih deuh deuh zel.
City an chak zo lo leh tawh
