K. Hmingthankaia
Tun ZPM sawrkara Tansport Minister, PWD Minister ni bawk hi an sawrkar hlim khan thil dang sawina karah khan ka lo fak deuh nual tawh a. Amah hi mi tawng tlem leh tawngkam thiam lo, mi fair lutuk leh mi dik tak mai a nih thute kha ka lo sawi tawh a nih kha. Amah hi kan veng Venghlui mi hlun, naupang te ni chunga kan venga MA pass hmasa pawl a nih avanga kan zah ruk leh kan ngaihsan ruk em em thin a ni. ZPM party awm hma zawng kha chuan Pu Thena hunlai atanga keimah ang thova PC ngar ngar thin a ni. Chuvangin, mi rinawm leh mi dik, mi tak nia ka hriat avanga ka lo ngaihsan ruk em em leh ka lo chhuan ruk em em thin a ni.
An sawrkar hlim, 2024/25 chho vela kawng chungchanga nasa taka an dem luai luai leh deusawh tak taka an chirhtheh lai pawh khan, eng dang vaka chhang lo leh sawi ve deh duah lova, “A hunah kawng kan siam dawn. A siamna tur pawisa pawh a awm” tih tawite a sawi kha chuan, a mizia enin kei chuan ka lo ring tawk em em a, kawng chu an siam ngei dawn tih kha ka lo ring nghet hmiah mai a ni. A sawi ang ngeiin a hun a tihah chuan, tunhma zawnga an lo siam dan tawh thin aia tha, kan ram zawh tawk atan chuan belhchian dawl ber ni turin kan Aizawl khawpui leh kan Zoram kawngte chu an lo siam ta ngei reng a nih hi. Chutiang taka mahni thil tih tuma chiang leh ti hlawhtling thei PWD Minister ni mah sela, Transport Minister a nihna anga city bus drop & pick chungchangah erawh hi chuan a hlawhchham chiang hle niin ka hria.
City bus chungchang hi kum 2018 vel atang tawh khan ka lo sawi tawh thin a. Khawpui kawng zim leh chep, kawng kan indaih loh em em kara kawngpui lun lai leh mipui che vel tamna lai apianga motor lian pui, nitin lo ding nileng thak ve ziah hian thaw a tipik a, mipui chet vel a tibuaia, kawngkan leh motor dang pelh a tibuaiin a ti hlauhawm em em a, traffic jam a tih tam zual phah thute, ram dangmi mikhual hmuhah a zahthlak thu leh, smart city nih nen pawh a inhmeh loh thute leh a kaihnawih thil tam tak ka lo ziak tawh thin a ni. Mahse, sawrkar hmasa lamah kha chuan ka beidawng a. ZPM lo sawrkar veleh khan beisei takin duhthawh tak leh dengkhawng deuh tak takte khan vawi engemawzat ka ziah leh hnu chuan, kum 2025 August thla chuan, September ni 1 2025 atang chuan city bus-te chu passenger chhuk chhung leh lawn chhung bak chu stand-ah an ding tawh tur a ni lo. Hei hi thla thum chhung, November ni 30 thleng enchhinna anga kalpui tur a ni, tih thupek chu sawrkar chuan a rawn chhuah ta rup mai a nih kha.
Kha September ni 1 ni tak mai khan AMC office |huampuia kal ka ngai hlauh mai a. Tichuan, ka kal lam leh haw lam chu bus-ah ka chuang ta a ni. Khami ni 1 ni na na na kha chu bus ho pawhin sawrkar thupek chu an zawm tha tlang angreng viau a ni. Conductor pakhat hnenah chuan, ‘Din rei in va la chak hmel ve’ ka ti a. Ani chuan, “Din rei pawh tum ila traffic police-ten min um chhuak zel alawm” a ti a. Kei chu ka lo lawm ru ta veng veng mai a nih kha. Tichuan, chumi ni la la chuan ZPM sawrkar chunga lawmthu sawina pawh chu ka ziak ta nghal a ni. Enchhin pawh a ngai lo, ni khat lek chhung pawhin a that zia leh nawm zia chu mipuiin an hria a, traffic police lam pawhin traffic a tih ziaawm phah an ti a ni. Chuvangin, hetiang hian kal reng tawh ila, ngaiah kan neih thuai mai ang a, thil pakhatah khawsak dan tha zawng leh changkang zawngin hma kan sawn a ni mai, te ka ti nghe nghe a nih kha.
Tichuan, ni sawm hnu, September ni 10 a ka han chhuak chho leh zet mai erawhchu, khai khai.. a tu-a-te mah bus ho khan sawrkar thupek chu an lo zawm leh ta reng reng lo mai chu lo niin.. An khawsak thin dan pangngai ang bawk khan an lo khawsa leh ta hem hem mai a nih chu. Stand tinah chuan inthiamlohna leh inthlahrunna reng reng nei lovin, thlamuang takin an lo ding leh ta veng veng mai a ni. Mite chu ka han zawt vel a, ‘Nikhat, September ni 1 ni bak kha chu an tih dan ngai bawk khan an ti leh nghal vek alawm’ an lo ti mai si.
Ka thinur leh rilru na, zak bawk si chu in pawh thleng lovin, rilru tawt tûn chungin a tlai a tlaiin State Transport Authority office chu ka pan nghal a. Transport Director bulah chuan tlai office ban pelh rawk thlengin ka inbun ruak thawl ta hawk a. Director min lo dawnsawn dan leh a mi chhannaah chuan lungawithlak ka tih avangin, Traffic SP office leh Transport Minister ina kal nghal ka tum pawh chu ka thulh ta rih a ni.
Mahse, chumi ni atang chuan sawrkar thupek chu bus tumahin an la zawm leh ta chuang reng reng lo chhunzawm ta ngar ngar a, sawrkar lam pawhin an thupek chu a zawm tura an tih, thupek an siam chhan berte chuan an zawm miah lo tih chu an mit ngeiin fiah em emin nitin an hmu a. Mahse, thupek zawmlote hrem tura chunglam atanga thu petu an awm lo a ni ang chu, vawiin thlengin kan heti ta mai mai zel ta a nih hi. Chutiang a nih leh si avang chuan ZPM sawrkar chunga lawmthu ka lo sawi thawt thawt kha ka zah leh thute pawh chanchinbuah bawk ka rawn ziak leh ta a nih kha.
Chutichuan, tun sawrkarah chuan city bus chungchang hi chu ka sawi tawh lovang ka ti zet naa, vawikhat chu drug addict ho chunga CYMA thil tih dana lawmthu ka sawi rualin, City bus pick&drop chungchangah pawh CYMA chu hma la ve tura ngenna ka ziah chu ka duhthu ngeiin, ka chin dan thina tawngkam dengkhawng deuh taka ka ziah chu city bus lam, ACBOA chuan an lo la na deuh a. An office-a lengah min sawm a, kei chuan an rilru tur chu hresa ranin phur takin ka kal ta a. Kan va inchhal deuh nual naa, inpawh tak leh lungrual takin thu kan sawiho thei ta a ni. Chu’ng thute pawh chu chanchinbuah bawk ka ziah leh vek kha.
Chumi hnu atang chuan city bus chungchang hi chu ka sawi tawh lovang, kawng hrang hrangin ka sawi hnem ta, ka ti a. Pu PLa’n PHE tui leak nasa lutuk a vei em em, kei pawhin ka lo veipui hi kawng hrang hranga vawi tam a sawi hnu pawha sawt silo, lungawi chuang silova a ngawihsan deuh tak ti tih ang deuh hian, kei pawhin city bus chungchang hi chu lungawi lo teuh chungin ngawihsan ve hrih deuh teh ang ka ti ta a. Amaherawhchu, vawikhat chu Transport Minister office-a ka len tumin amahin a rawn sawi chhuak a, innel takin kan inchhang a. Mahse, ka duh aiin a la thu tak lo deuh nia ka hriat avangin kei chuan fiamthu ti tak deuh si hian a hnenah chuan, ‘He thilah hian tlawm ka tum miah lo a nia’ ka ti nachungin, engtia tih leh tur nge tih phei chu ka hre tawh chiah chuang lova. Mahse, rilru chuan inthlan leh hun turte chu a thlir ru ve deuh rum rum thin a ni.
Chutia ka awm mai mai tawh lai, city bus lam pawh ka lo ngaihtuah peih tawh loh lai chuan, 2026 May thla chuan, ‘2026 June ni 1 atang chuan city bus te chu passenger chhuk leh lawn chhung bak chu stand-ah an ding tawh tur a ni lo’ tih thu chu sawrkar chuan a rawn tichhuak leh ta lawi si a. Kei chuan, eheu, engtizia nge ni ta, Minister khan a ngai pawimawh lutuk lo khan ka hre si a, tunge lo nawr ve awm le aw, ka ti a. Tin, zawm a hlawh leh tak tak pawh chu ka ring chiah chuang lo naa, vawihnih thupek chhuahna te a ni bawk a, sawrkar pawh a khauh deuh tawh ring ru deuh chung leh lawm ru deuh chung si chuan, June ni 1 chuan enchhin tur a nih chu, ka ti rilru naa, ka rin lutuk loh deuh bawk si avang chuan ka phur lutuk duh tawh lova, June ni 2 chuan ka enchhin ta zawk a.
Revenue north office leh Mizofed office Ramhlun norh kal nan leh haw nan chuan bus-ah chuan ka chuang ta a. Tichuan maw.. A sawi pawh ka sawi zawm duh dawn emaw ni le.. Zahthlak, thinurthlak, tlawmthlak tak hi a ni ringawt. A khawilai teah mah chuan a tu bus mah chuan sawrkar thupek chu an lo zawm leh ta awzawng chuang lova. Stand tin maiah chuan an mawngah an inhnim chhuak leh ta dun dun zel tho a nih chu. Khawpui laili, mihring leh police tamna, kawng lun leh chep lai stand-ahte phei chuan an inthlahrung ve deuh ang chu ka ti a, a teuh lo lutuk, sawrkar thupek a awm tih pawh hre reng reng lo niawm tak hian, motor switch an han off sauh sauh a, driver chuan meizial an han zu ta veng veng mai thin a nih chu. City bus enkawltuten meizial an zu thin hi ram dangmi mikhual hmuhah a mawi loh thute hi ka lo sawi tawh thin a, mahse, a ngaihna kan awm ngang lo zawng a nih hi.
Aizawla hmun pawimawh, sawrkar hmun pawimawh, Traffic SP office pawh a bul lawka awm, Treasury stand-ahte chuan traffic police-te chu kawng chhak leh thlangahte chuan ding ve reng mah sela, city bus driver leh traffic police-te chuan melh pawh an inmelh peih lo, hnawksak takin bus lian pui chu kea kalte tibuai tur chuan a ding ruau lui tlat a. Traffic police te pawh an ding kawh ve luah ringawt mai a ni. Ho tak a ni.
City bus-te an stand-a ding reng zel lova an tlan leh nghal mai zel hian, tuna kan khawsak dan ai ngawt chuan a nawm zawk ziate, a thawventhlak zawk ziate hi hre thiam turin city bus chunga in thupek hi sawrkar hian han kengkawh chhin teh u. Tuna Aizawla mipui kan chet vel dan leh kan khawlai kawng awmdan han thlir hian, nilenga motor lian pui mai kan khawlai pawimawh lai apiang kan awh hnawk luihtir tlat zel mai hi chu tih danglam theih chu a ni asin maw le. Hetiang ti danglam thei lo sawrkar leh a changtu Minister nih pawh hi a tlawmthlak deuh lo maw. Chutiang ai mah chuan, sawrkar ve riang ruangin tute emaw zawm tur thupek han chhuah ve lema, a zawmtu tur-ten an zawm leh zawm loh pawh chu mipui zawng zawng leh sawrkar pawhin nitin an hmuh theih reng nichunga, hetia chhete maha ngaihpawimawh a hlawh lo leh zawm tumna eih pawh awm miah lo hi a mak a. A thupek zawm duhlote chunga sawrkarin action a la ngam lo mawlh mai hi a mak ber lai zawk chu a ni e.
Kuhva rah ro mitsiai ai pawh khan city bus ho mitsiai hi a lang chiang zawk a. Hetiang sawrkar dawihzep tak leh Transport Minister hlauhawm lo tak, city bus ho pawh ngam lo hi chu taxi ho pawh hian an hlauh bik vak a rinawm loh reng a ni.
City Bus drop & pick : Sawrkar dawt bawk maw
