City Centre sak tur lungphum phum
Ningani khan deputy chief minister Tawnluia’n Dawrpui venga City Centre sak tur lungphum a phum.
City Centre lungphum phum a ni chu lawmawm a tih thu a sawi a, City Centre hi hmasawnna leh changkanna rahbi thar, Aizawl khawpui cheitu tur ruhrel pawimawh tak a ni, a ti.
City Centre chu Aizawl mite tan mai ni lovin, Mizoram khaw hrang hrangte tan pawh tlawh chakawm tak a ni dawn niin a sawi a, Mizoram tana hmun pawimawh leh tangkai tak a nih a beisei thu a sawi.
Mizoram sorkarin uluk taka a ngaihtuah hnu-ah Bara Bazar-a thu thinte an len vek theihna turin he project atana sum dah, cheng vaibelchhe 34 chu vaibelchhia 41.59-ah tihpun a ni tiin a sawi a, Bara Bazar-a thu thinte nena inbiak a nih hnuah pawisa dah hi tihpun a ni tih a sawi.
City Centre awmna tur Dawrpui veng chu Aizawl veng hlun a nih thu a sawi a, veng mite chu neitu thinlung pu a, he Project hlawhtlinna tur leh sak zawh a nih huna a enkawl kawngah theihtawp chhuah zel turin a sawm.
City Centre chu Aizawl Smart City hnuaia project pakhat a nih thu a sawi a, Smart City hnuaia project-te hi a kalkawng a thui thin hle a, a chhan ber chu uluk taka project vil thintu Project Management Consultants (PMC) awm vang a ni a ti. Tuna sak tur City Centre pawh hi uluk taka kalpui niin, a leilung zirchiang tur pawhin state pawn lam atangin mithiam zawk (geologist) te rawih an nih thu a sawi a, contractor te’n tha taka hna an thawh theihna turin UD&PA leh Project Management Consultants (PMC) te’n an vil dawn tih a sawi. City Centre hi sak zawh anih hunah Commerce & Industries Department-te kutah hlanchhawn a nih tur thu a sawi bawk.
Lalrohlua,Chief Executive Officer, Aizawl Smart City Limited-in report a pe a, contactor atan M/s Lushai Engineers thlan niin; Project Cost chu cheng vaibelchhia 41.59 a ni tih te, City Centre building hi Block A (chhawng sarih) leh Block B (chhawng nga)-ah then niin, dawr 1105 a awm dawn a, parking atan 4, Wheeler-31 Nos leh 2 Wheeler-79 Nos a awm thei dawn a, Cold storage, CCTV, Services lift, Office, Food court, Conference Hall, ATM booth leh thil tul dangte a awm dawn a ni, a ti.
City Centre sak tur lungphum phum
![](https://theaizawlpost.org/wp-content/uploads/tap_logo-min-large.jpg)