Zirtawpni tlai khan Champions League quarter-final-a intum tur pawh fel a ni a. Premier League champion Manchester City chuan German champion Bayern Munich an hmachhawn dawn. UCL champion Real Madrid leh Chelsea inhmachhawn tur chu inkhel ngaihven hlawh a ni tel bawk.
Europe a team lian pahnih Manchester City leh Bayern Munich te inhmachhawn tur hian ngaihven a hlawh a, an ni pahnih inkhel hi hmuhnawm hle tura ngaih a ni. An inkhela chak zawk zawk hian semi-final-ah Chelsea leh Real Madrid te inkhela chak zawk zawk an hmachhawn zui leh dawn a, an tan final kawng a hautak dawn hle. Final an lut a nih erawh chuan final hi quarter-final leh semi-final aia hautak lo zawk a ni thei thung.
UCL champion Real Madrid in EPL club lian Liverpool an hnawhchhuah hnuah London club lian Chelsea an hmachhawn zui leh dawn a, English club tan ral hlauhawm tak an ni. Thlasik bazar laia sum seng hnem filawr Chelsea hian chak an thiam thar a. Inelna dangah champion beiseina an nei sang tawh lo bawk nen champions league-ah champion tumin an theihna zawng zawng an seng thei dawn a. Hei hi Real Madrid tan an hlauhawm theihna tur a ni ang.
UCL quarter-final-ah hian Italian Serie A hmahruaitu Napoli chuan Serie A champion lai AC Milan an hmachhawn dawn a. Ram dang team lian zawk an pumpelh hlauh vangin Napoli hi an lawm viau tura ngaih a ni. Serie A club lian dang Inter Milan pawhin Benfica an hmachhawn ve dawn bawk. Inter Milan in Benfica hneha semi-final an lut a nih chuan Italian club pakhat talin ULC final an khel tawh tihna a ni nghal dawn bawk.
Champions League quarter-final thawh khatnah hi April ni 11 leh 12 zanah khelh a ni ang a. April ni 18 leh 19 zanah second leg khelh a ni ang a, final hi June ni 10 khian Istanbul a Ataturk Olympic Stadium ah khelh a ni thung ang.
City hmachhawn tur Bayern
![](https://theaizawlpost.org/wp-content/uploads/tap_logo-min-large.jpg)