Inrinni zan khan English Premier League (EPL) 2025-26 khelh chhunzawm a ni a, pahnihnaa awm mek Manchester City chuan an mualah hnehna an chang a, hmahruaitu Arsenal nen an inkar an tizim leh zual. City an chak laiin Pathumnaa awm mek Aston Villa an chak zo lova, Chelsea pawhin uiawm takin point thum an hmu zo lo bawk.
City chakpuitu O Reilly
Arsenal nen an inkar tizim leh zual tura chak mamawh Manchester City hian Etihad Stadium-ah Newcastle United an mikhual. Newcastle hi team khawng pangngai tak mai an ni a, City tan pawh zuam sual theih tak tur an ni. An mualah chesual thei an ni tih Pep Guardiola team ten an hria a, fimkhur takin an inlan. An mualah an khel tha a, chawlhlawk hmaa goal hnih an thun hmangin hnehna an chang. City tana goal hnihte hi Nico O’Reilly thun ve ve a ni.
City hian an mualah bul an tan tha a, inkhel tan atanga minute 14-naah Nico O’Reilly chuan hmahruaina goal a thun nghal. Hma takah goal an thun vangin phur viau mah se City hi an phur rei bik lo. Minute 22-naah Lewis Hall chuan Newcastle tan goal thunin an si phurh a sut.
Goal khat ve ve an thun hnuin inkhel a hmuhnawm zui viau a, goal dang pawh a luh belh leh thuai bawk. Newcastle in an si phurh an sut atanga minga hnu lekah hmahruaina goal thuntu O’Reilly chuan an goal hnihna a thun a, an mikhual lakah hma an hruai nawn leh. Minute 27 chhung leka goal thum lut bak hi hun tawp thlengin a luh belh thei tawh lova, City chuan an mualah hnehna pawimawh tak an chang a, point thum an hmu.
Newcastle United hnehtu Manchester City hian champion thei turin hma lam an pan zel. An chunga chiaha awm Arsenal nen an inkar point hnih chiah a tla zep tawh. Arsenal hian Pathianni zan khan Tottenham Hotspurs an hmachhawn a, City aiin an khel tawk zawk chiah. Tottenham lakah an tlawm a nih chuan City in an khelh zat an khelh hunah an lehpel daih thei dawn. Heti a nih vang hian City hian champion theihna hun tha tak an nei a, phur takin hma lam an pan zel. City an chak zel hian Arsenal tan pressure tam zawk a pek belh zel a, champion tuma Arsenal nen an inum boruak a ngaihnawm ta hle a ni.
Villa an chak zo lo
Inrinni zana inkhel dangah pathumnaa awm mek Aston Villa in hnehna an chang zo lova, an mikhual Leeds United nen 1-1 in an inhnehtawk.
Champion beisei zui thei tura chak mamawh Aston Villa hian an mikhual Leeds U nited lakah goal an chhuah hmasa. Leeds tan hian Anton Stach chuan minute 31-naah hmahruaina goal a thun. He goal hmang hian hun rei tak chhung hma an hruai a, Villa hi an hneh teuh hle nghe nghe. Hun rei tak chhung si an phurh hnuin Villa tan hian Tammy Abraham chuan minute 88-naah goal thunin an si phurh a sut a, an mualah tlawm an pumpelh thei hram a, an mamawh point thum an hlawhchhuak zo lo.
Leeds United laka chak zo lo Aston Villa hian point 51 hmuin pathumna an luah nghet zui a. An hnuaia awm Chelsea leh Manchester United ten point 45 ve ve an hmu a, an dinhmun a la him thawkhat. Thawhtan zanah United an chak chuan Villa nen an inkar a zim sauh dawn thung.
Chelsea an chak zo lo
Aston Villa an chak zawh loh laiin Chelsea pawhin an mualah hnehna an chang zo bik lova, an mikhual Burnley nen 1-1 in an inhnehtawk. Chelsea tan hian João Pedro chuan minute 4-na lekah hmahruaina goal thun mah se Brunley tan Zian Flemming chuan minute 90’+3-naah a sut a, team lian lakah tlawm an pumpelh zui ta a ni.
City in Arsenal an hnaih
