Hliamin a tihbuai nasat Manchester City chuan defender lak tur an dap ruai ruai a, Crystal Palace captain Marc Guehi chu lak tumin an ngaihven. Dawrna pawmawm tak an dawng a nih chuan Crystal Palace pawhin an captain hi hralh an hnial lo ve bawk.
EPL-ah pahnihna ni mek City hi hliamin a tibuai viau a, an defender pathum; Josko Gvardiol, Ruben Dias leh John Stones te an chhawr thei lo mek. Hliam vanga John Stones a chawlh reng hnuin Pathianni kal ta zana Chelsea an hmachhawn tumin Gvardiol leh Ruben Dias te an inhliam thar ve leh bawk. Heti a nih vang hian tlarhnungah an buai thar hle a. An defender tha ten hliam an tawrh vangin Watford-ah loan-a an chhuahtir academy defender Max Alleyne pawh a kokir tawh hial a. An buai thar vang hian defender lak tumin hma an la nghal. City in lak an duh ber chu Crystal Palace leh England defender Marc Guehi a ni.
Nipui bazar inhawn lai khan Guehi hi Liverpool in an la teuh hle a, eng emaw pelhsawlh zeuh a awm vangin an inla lut fel thei ta lo hlauh thung. Palace-ah hian tun season daih chauh contract a neih tawh, nipui bazar inhawn hunah free transfer-a lak theih a nih dawn vangin Guehi hian ngaihventu a ngah hle. Lak tuma ngaihventute zingah hian EPL club lian Liverpool leh Manchester City te bakah ram dang club Bayern Munich, Real Madrid, Barcelona, Inter Milan leh Atletico Madrid te pawh an tel niin tarlan a ni.
Nipui bazar inhawn hunah man leh mual awm lova chhuak thei a nih vangin Palace hian a man an tel theih lai thlasik bazarah Guehi hi hralh an hreh lo. Palace manager Oliver Glasner chuan a man phu tawka dawrtu an awm a nih chuan Guehi hi hralh an hreh loh thu a sawi. Nipui bazar inhawn lai khan £35m in an hralh teuh hle a. Thlasik bazarah chua hei ai hian a man a tlawm tawh ngei dawn. Chuti a nih chuan City tan Guehi hi lak harsa lo tura ngaih a ni. Defender manager City in Guehi an la lut a nih tlarhnunga buai thar City tan thawkhuaina tham a ni ang a. Man leh mual tel a, sum hlawm lian an hai luh theih lai a nih vangin Crystal Palace tan pawh Guehi hralh hun lai tak a ni ve tho bawk ang a, team hnih tan hlawkna a ni ve ve ang.
City in Guehi an ngaihven
