City lakah Liverpool an zawr

Inrinni zan khan FA Cup quarter-final khelh a ni a, Liverpool chu Manchester City lakah 4-0 ngawtin an tlawm a. City lakah Liverpool hi dawl zawr takin an zawr. City in Liverpool an sawp rual hian Chelsea chuan Stamford Bridge-a an mikhual Port Vale chu 7-0 ngawtin an sawp a, awlsam takin semi-final an lut ve bawk. Inrinni zan kha FA Cup quarter-final a insawp zan a ni deuh ber mai.
Haaland a inhrithla
Etihad Stadium-ah Manchester City leh Liverpool te intum tur hian ngaihven a hlawh a, champion tura rinkai leh team lian insu a nih vangin inkhel hmuhnawm tak a nih beisei a ni. Inkhel hmuhnawm taka bul tan hi minute 20 vel chhung leka Liverpool an talbuai thui em vangin beisei pahk lo takin a tawp ta a tih theih. Season tawp lama goal thun harsat chho ta deuh tlat Erling Braut Haaland chu Reds lakah hian a inhrithla a, goal thum ngawt a thun.
Champion tura rinkai pahnih City leh Liverpool te hi inkhel tir lamah an inhnehtawk viau a, inkhel hmuhnawm an lantir. Liverpool in bul an tan tha a, goal thun theihna hun tha tak nei hmasaiin Hugo Etikite chuan uiawm takin a hun tha neih a hlah a, goal kham chungah a pet chhuak luah.
Liverpool in an hun tha neih an hlah hnuin City in fuh takin an nawr let a, goal thun theihna hun tha hmuin penalty an hlawhchhuak. Penalty hi Erling Haaland chuan awlsam takin a pet goal a, minute 39-naah hmahruaina goal a thun. Hmahruaina goal an thun hnuin City an khel tha chhunzawm a, hmahruaina goal an thun atanga rei lo minute 45+2-ah goal hmahruai thuntu Haaland chuan an goal hnihna a thun zui leh zat a, team lian lakah 2-0 a hmahruai chungin chawlhlawk an hmang.
Goal hniha hma an hruai vangin City phurna leh inrintawkna a so sang hle tawh a. Hetihlai hian goal hnih an chhuah vanga Liverpool buaina a thuk viau tawh thung. An khingpui buai zual lai chuhin City in na takin Liverpool an nawr chhunzawm a, second half=ah goal an thun belh leh thuai. Second half tan atanga minute nga hnu lekah City hian fuh zetin an mikhualte an nawr tlang a, Ryan Cherki ball pek fing leh fuh zet mai chu Antoine Semenyo chuan awlsam taka pet goal in, minute 50-naah an goal thumna thunin, an hmahruaina a tizau leh zual.
Goal thum an chhuah zawn hnuin Liverpool in goal thun tumin tan an khawh a, an khingpuite an nawr tlang a, goal an thun teuh hle. Liverpool hun tha neih chu si nghak James Trafford chuan tha taka save in a tihlawnsak leh a, an team a chhanhim nawn leh. Goal an chhuah thelh hnuin City an harh leh zawk a, fuh taka an khingpuite nwr tlang zui lehin goal an thun belh zui leh. Nico N. O’Reilly siamsak tha tak chu Erling Haaland chun minute 57-naah awlsam takin a pet goal a, an goal lina a thun. Season tir lama goal thun thei tak, season laihawl hnu lama goal thun harsat deuh ta tlat Haaland hian Liverpool lakah a thinrim a hrithla a, goal thum ngawt thunin lungthu a kim ta hial a ni.
4-0 ngawta Liverpool an sawp vangin Manchester City in awlsam takin semi-final an lut a, champion turin rin an kai leh zual hle. City hi Carabao Cup final-ah Arsenal hnehin an lo champion tawh a. FA Cup-ah semi-finan lutin English Premier League-ah champion thut thei an la ni tho bawk a, trophy lian pathum nen season khar thei dihmunah an ding mek. Hetihlai hian Liverpool erawh chauan kut benga season khar an hnaih ta viau thung.
Chelsea 7-0 Port Vale
Manchester City in team lian Liverpool an sawp laiin Chelsea chuan an hneh ngei tura ngaih League One team Port Vale chu 7-0 ngawtin an sawp a, awlsam zetin semi-final an lut ve bawk.
Chelsea hian Stamford Bridge-a an mikhual Port Vale an ngam viau a, goal pawh an thun hma hle. Blues tan hian Jorrel Hato chuan inkhel tan atanga minute hnihna lekah hmahruaina goal a thun nghal. Team lian lakah goal an chhuah hma em vangin league one team an talbuai a, a khat mawi tawkin goal an chhuah a ni ta deuh ber mai.
Hma taka goal an thun hnuin Blues tan hian João Pedro chuan minute 25-naah an goal hnihna thunin, an hmahruaina tizau phawt a. Chawlhlawk dawn hnaih minute 43-aah Jordan Lawrence-Gabriel chuan an lamah ti-goal palhin mualneitu goal thumna a thunsak zui leh a, 3-0 a hmahruai chungin chawlhlawk an hmang.
Chawlhlawk hnu lamah Chelsea an khel tha chhunzawm a, goal li ngawt an thun belh leh. Blues tan hian Tosin Adarabioyo chuan minute 57-naah an goal lina a thun a. Hemi hnu hian Andrey Santos, Estêvão leh Alejandro Garnacho ten goal an thun belh zui leh bawk. Chelsea hi an champion theihna awmchhun chu FA Cup hi a ni tawh a. FA Cup-ah champion ngei tumin thapui an thawh zui ang.