Premier League champion Manchester City leh Saudi Pro-League club Al-Ahli te chu Algeria winger Riyad Mahrez man leh mualah £30m in an inrem.
City hian kum 2018 khan winger tha tak Mahrez hi Leicester City atangin an la lut a, a manah £60m zet an seng. Manchester City tan hian inelna hrang hrangah vawi 236 a khel a, goal 78 a thun tling hman. Season liam ta khan City tan inelna hrang hrangah vawi 47 a khel a, goal 15 a thun. Season liam taah pawh che chhe lem lo viau mah se FA Cup leh Champions League final-ah bul a tan phak lova, bench atangin a lut ve ve thung. Mahrez hi EPL-ah player hlawhtling ber ber zingah a tel a, EPL trophy vawi nga ngawt chawi hman in, City tan vawi li a chawi a, Leicester City tan vawi khat a chawi bawk.
EPL champion City hi season thar atana inbuatsaih an Japan leh South Korea-ah an zinchhuak dawn a, Al-Ahli nen inremna an neih tak vangin Mahrez hi zin loh phalna an pe. Mahrez hi chhuak ngei tura ngaih a ni tawh a, ani bakah hian England defender Kyle Walker, Portugal midfielder Bernardo Silva leh Spain defender Aymeric Laporte te hma lam hun a chiang lo mek bawk. An hma lam hun chiang lo bawk mah se Walker, Silva leh Laporte te erawh hi chu Japan leh South Korea-a zinchhuak tur zingah an tel thung.
Mahrez hmunruak luahtu tur City in an zawng zui nghal a, EPL-a tawnhriat lo nei tawh Brazil leh Barcelona winger Raphinha lak an tum dawn.
Sum tama Saudi Pro-League in player uaithla lam a hip chhunzawm zel. Al-Ahli in Mahrez an la ngei dawn niin a lang tawh a. Liverpool captain Jordan Henderson pawhin Al-Ettifaq a zawm ngei dawn niin a lang a. Liverpool midfielder dang Fabinho pawhin Saudi club a zawm ngei dawn tiin a lang ta bawk.
City leh Al-Ahli an inrem
