City leh Arsenal an tlawm

Inrinni zana English Premier League khelhah team lian pahnih Manchester City leh Arsenal te an chak lova, an tlahniam ve ve. Team lian pahnih an tlawm lai hian Southampton chuan season thara a vawi khat nan hnehna an chang ve nawlh thung.
Champion lai Manchester City hi AFC Bournemouth hmachhawn turin Vitality Stadium-a an leng lut. An lenluhna mualah beisei an phak lova, 2-1 in an tlawm. Mualneitu Bournemouth hian rin phak bakin champion lai City lakah a khel tha a, goal pawh an thun har lo. Inkhel tan atanga minute 9-na lekah Antoine Semenyo chuan hmahruaina goal a thun a, Pep Guardiola team te a barakhaih.
Hma takah goal a luh hnuin inkhel a hmuhnawm zui hle a, City in an si phurh sut tumin tan an khawh nasa hle. Goal thun tuma City tan khawh a hmuhnawm viau a, Bournemouth tlarhnung an nawr tlang teuh thei hle. Goal thun an mamawh viau laiin City hian goal an chhuah belh tlat thung. Mualneitu Bournemouth tan Evanilson chuan minute 64-naah an goal hnihna a thun a, an hmahruaina a tizau.
City lakah goal hniha hma an hruai hnuin Bournemouth hian an goal ven him tumin tan an khawh nasa hle. City in goal thun ngei tumin thapui an thawh ve thung a, inkhel a hmuhnawm hle. Na taka an nawr rah an seng a, City hian goal an tun ta nge nge. Hun tawp dawn hnaih minute 82-naah defender Josko Gvardiol chuan goal thunin an si phurh a sut then. Tlawm pumpelh turin goal thun belh tum viau mah se City an hlawhtling zo tawh lova, season thara vawi khat nan Manchester City hi an tlawm ve ta nge nge a ni.
AFC Bournemouth lakah an tlawm vangin Manchester City hian an hmahruaina chu Liverpool lakah an hloh fel. City hian khelh 10 atangin point 23 an hmu a, an chunga awm Liverpool aiin point hnihin an hniam zawk mek.
Champion lai leh hmahruaitu ni bawk Manchester City an tlawm hma lawk hian champion tura rinkai Arsenal chu Newcastle United hneh lovin an lo tlawm ve bawk.
St James Park-a inkhel hmuhnawm takah minute 12-na leka Alexander Isak goal thun hmangin mualneitu Newcastle United in hnehna an chang. EPL-ah an tlawm zawn vangin Arsenal hi pathumna atangin palinaah an tlahniam. Gunners hian khelh 10 atangin point 18 an hmu a, West Ham United hnehtu Nottingham Forrest in point khatin an lehpel.
Inrinni zana inkhel dangah Southampton chuan an mikhual Everton chu hun tawp dawn hnaih minute 85-naa Adam Armstrong goal thun hmangin an hneh a. Saints hian season thara a vawi khat nan hnehna an chang ve nawlh. Saints an chak lai hian table mawngphaha awm Wolves chuan an mualah point khat an hmu ve bawk.
Wolves hian an mahni ang tho va che chhia Crystal Palace an mikhual. An mikhual lakah goal chhuah hmasa mahse tlawm an pumpelh ta hram thung. Palace tan hian Trevoh Chalobah leh Marc Guéhi ten goal an thun a. Wolves tan hian Jørgen Strand Larsen leh João Gomes ten goal an thun ve bawk. Wolves hian khelh 10 atangin point thum chiah an la hmu.