February 22, Nilai zan khan UEFA Champions League – last 16 khelh chhunzawm a ni a. Premier League champion Manchester City chu RB Leipzig hmachhawn turin Germany-ah an zin a. Mikhual an nihna Red Bull Arena-ah goal thun hmasa zawkah tang mahse an him tluan thei bik lova, RB Leipzig si khat ve ve inpe in an inhnehtawk. Inkhel dangah Italian Serie A club lian Inter Milan chuan si khat faiin an mikhual FC Porto an hneh ve thung.
City in chak an harsat
Premier League champion Manchester City hi beisei angin an khel tha tawk lova, an khelh hnuhnung pahnihah an chak zo lo ve ve. Inrinni zan khan Nottingham Forrest nen 1-1 in an innehtawk ringawt a, EPL-a hmahruaitu an nihna Arsenal lakah an hloh zui nghal. Harsa lutuk lova an hneh theih tura ngaih RB Leipzig lakah goal thun hma in, inkhel thunun zui viau mahse an chak zo ta chuang lo. City hian RB Leipzig mualah hnehna an la chang thei lo tluang zel.
City hi mikhual an nihna Red Bull Arena-ah an huangtau viau a, an khel tha hle. Chawlhlawk hmain Pep Guardiola team te hian an khel tha lehzual a, an khingpuite an thunun hneh viau. Ball chang tam City hian fuh zetin ball an inpekual a. Riyad Mahrez chuan awlsam taka pet goal in, minute 27-na lekah hmahruaia goal a thun. Mahrez-a’n goal a thun theih nan City ball inpekual a hmuhnawm hle. RB Leipzig player Xaver Schlager-a ball pass sual chu City forward Jack Grealish-a’n changin, Grealish hian captain Ilkay Gundogan a pe a, Gundogan hian Riyad Mahrez tan fing zeta lo a kheng zeuh a. Mahrez hian fuh takin a tawp a khar ta a ni.
Minute 27-na lekah goal an thun vangin City hi phur leh inringtawk zawkin an inlan a, goal pawh an thun belh teuh thei hle. Khel tha viau mahse City hian chawlhlawk hmain goal dang an thun belh thei lova, 2-1 a hmahruai chungin chawlhlawk an hmang.
Mualneitu RB Leipzig in chawlhlawk an hmang tangkai a, second half-ah an khel tha ta viau. Huaia takin an mikhual an nawr chiam a, goal pawh an thun nghal teuh hle. Andre Silva hun tha neih chu City si nghak Aderson-a’n a tihthlawnsak a, an team a chhanhim phawt. Hun tha tak hloh bawk mahse hun tha dang an nei zui leh a, goal an thun ta nge nge. Minute 70-naah Josko Gvardiol chuan short corner atanga ball kal chu chiang zetin a tauh goal a, an si phurh a sut ta nge nge.
Goal khat ve ve an thun hnuin City in chak tumin tan an khawh thar a, chak theihna hun tha pawh an nei. Captain Ilkay Gundogan chuan a hun tha neih uiawm takin a hlah a. Gundogan hun tha neih hi Leipzig si nghak Janis Blaswich chuan a dansak a, City goal thun khawl Erling Haaland pawhin goal thun theihna hun tha a hlah ve bawk. Hun tawp thlengin goal dang a luh belh thei tawh lo va, RB Leipzig leh Manchester City chu 1-1 in an inhnehtawk zui ta a ni.
Striker pakua ka luhtir mai thei – Pep
EPL an khelh hnuhnung berah Notting-ham Forrest nen 1-1 a an inhnehtawk hnuah RB Leipzig lakah 1-1 bawka an inhnehtawk zui leh zat a. Hun tha an neih tam ngaihtuaha goal an thun tam theih loh vangin City manager Pep Guardiola chuan goal tam zawk thun an mamawh thu a sawi a. Fiamthu thawh zuiin Pep Guardiola hian Eithad Stadium-ah RB Leipzig an mikhual hunah chuan striker pakua a chhawr tawh mai thei niin a sawi a, fiamthu a thawh. Pep Guardiola hian Mimualah tlawm an pumpelh thei chu a lawm kim lo mah se result chhia-ah a ngai hran lova, Etihad Stadium-ah hneh na changin, quarter-final an luh zui ngei a ring.
Inter Milan chakpui tu Lukaku
Nilai zana inkhel dangah Italian Serie A club lian Iner Milan chuan San Siro-a an mikhual FC Porto lakah si khat faiin hnehna an chang. Inter Milan laka an chakna goal hi Romelu Lukaku thun a ni.
Inter Milan leh FC Porto te hi an inhnehtawk viau a, goal pawh a lut har viau. Hun rei tak chhung goal lut a awm theih loh hnuin mikhual team Porto player Otávio chu Inter Milan player Hakan Calhanoglu a tihtluk vangin hnawhchhuah a ni. Kim lo zawk an nih vangin an tan chet a har a, minute 86-naah Denzel Dumfries siamsak atangin Lukaku chuan goal-ah a chantir a, chakna goal a thun zui ta a ni.
City leh Leipzig inhnehtawk
![](https://theaizawlpost.org/wp-content/uploads/2023/02/city-2.jpg)