November 25, Inrinni zan khan English Premier League khelh chhunzawm a ni a, inkhel ngaihven hlawh takah champion lai Manchester City leh an mikhual Liverpool te chu 1-1 in an inhnehtawk. City leh Liverpool an inhnehtawk lai hian Chelsea chu Newcastle United lakah an lo tlawm ve thung.
Reds chhanhimtu Arnold
EPL 2023-24 season a hmahruai mektu Manchester City leh pahnihna luah mektu Liverpool te hi hmahruaitu nih inchuhin Etihad Stadium ah an inhmachhawn a. Hun rei tak si an phurh hnuin hun tawp dawn hnaihah Trent Alexander-Arnold goal thun hmangin Liverpool in tlawm an pumpelh a, point khat hlu tak an hmu.
Manchester City hian an mualah bul an tan tha a, Liverpool si nghak Alisson tihsual vangin Phil Foden chuan goal thun theihna hun tha zet mai a nei a. Foden hian goal thun tur khawpin a pet tha thei bik lova, a hun tha a hloh. Foden-a’n hun tha a hloh hnu hian City goal thun khawl Erling Haaland chuan defender Nathan Ake siamsak atangin minute 27-naah hmahruaina goal a thun.
City hmahruaina goal thuntu Haaland hian English Premier League-ah goal 50 a thun tling ta chiah a, EPL-ah goal 50 thun tling rang ber record thar a siam nghal. Borussia Dortmund atanga Manchester City a zawm hnuin Haaland hian goal thun lamah record a siam chho mawlh mawlh. Goal 20 thun tling rang ber record a siam hnuin EPL season khata goal thun hnem ber record a siam zui leh a. Liverpool laka goal a thun hmangin EPL-a goal 50 thun tling rang ber record thar a siam zui leh ta a ni. Goal thun thulh hleithei lo Haaland hian EPL-ah goal 50 thun tling turin game 48 chiah a mamawh.
Haaland goal thun hnuin City tan Ruben Dias chuan goal a thun belh leh a, he goal hi hnawl a ni ta thung a, dinhmun chhe zual zawkah Reds an tluk luh loh phah hlauh. Hun rei tak si an phurh hnuin Liverpool hi hun tawp dawn hnaihah an che fuh a. Minute 80-naah Alexander-Arnold chuan Mohamed Salah siamsak atangin goal a thun a, an si phurh a sut.
1-1 a nih hnuin inkhel a hmuhnawm zui viau a, goal thun tumin an innawr tawn nasa hle. Inkhel hmuhnawm tak hi goal dang luh belh lovin a tawp a, point khat ve ve hmuin an inthathen ta a ni. An mualah chak zawh loh vangin City an hmahruaina Arsenal lakah an hloh. Gunners hian hun tawp dawn tep a Kai Havertz goal thun hmangin Brentford an hneh a, City leh Liverpool an lehpel. City pahnihnaah an chhuk a, pathumnaah Reds an awm ve bawk.
Chelsea an tlawm leh ta
Season thara bul tan tha lova, tunhnaia an khelh that vanga phur thar hluai Chelsea chu Newcastle United hmachhawn turin St James Park-ah an lenglut a. Mikhual an nihna mualah point hmuh beisei viau mah se 4-1 ngawtin an tlawm a, season kal mekah a vawi nga nan an chak lo. Magpies lakah an tlawm vangin Chelsea hian table laihawl an chhuahsan thei rih lo.
Newcastle United tan hian Alexander Isak chuan minute 13-na lekah hmahruaina goal a thun. Isak goal thun hi Chelsea tan Raheem Sterling-a’n minute 23-naah a sut a. Inhnaihchilh taka goal hnih a luh hnuin goal dang a luh belh thei lo vang vang. Hun rei tak chhung goal lut a awm loh hnuin Jamaal Lascelles chuan minute 60-naah hma an hruai nawn lehna goal a thun a. Lascelles goal thun atanga minute khat hnu lekah Joelinton chuan an goal thumna a thun zui le zat bawk. 3-1 an hnu fual hnuin Chelsea captain Reece James chu minute 73-naah hnawhchhuah a ni a. Tam zawk an nih hnuin Magpies tan Anthony Gordon chuan goal a thun belh leh a, 4-1 in an chak ta a n
City leh Liverpool an inhnehtawk
