Internation break a zo va, tualchhung league hrang hrang khelh chhunzawm a ni leh nghal dawn. English Premier League (EPL)ah zanin hian inkhel pasarih ngawt a awm dawn a. Inkhel ngaihven hlawh; Manchester City leh Liverpool te inkhel hmangin bul tan a ni ang.
An mual; Etihad Stadium a inlan tur Manchester City hian an mikhual Liverpool lakah fiahna hautak an hmachhawn a ngai dawn. Pep Guardiola team City hian Liverpool an hneh a nih chuan EPL-ah champion nawn leh turin dinhmun tha zawkah an ding ang a, Arsenal lehpel turin inrintawkna sang zawk an nei ngei dawn. An mualah an tlawm emaw, Liverpool nen an inhnehtawk emaw a nih chuan champion an beiseina chuaiin, dinhmun chhe zawkah an ding ve thung lawi ang.
Champion thei tura City tan chak a pawimawh ang chiahin champions league khel phak thei turin Liverpool tan chak a pawimawh bawk. Reds hi paruknaah an awm mek a. Palinaa awm mek Tottenham aiin vawi khata khel tlem zawk chungin an inkarah point sarih a tlazep mek. Team lian Manchester City lakah point an hlawhchhuak thei a nih chuan UCL khel phak an tumnaa rahbi an tuk belhna pawimawh tak a ni ang. Reds hian season kal mekah trophy lak beisei tur an nei tawh lova, an tum lian ber chu champions league khelh phak a ni. UCL khelh phak an tumnaah an tih theih eng pawh Jurgen Klopp-a team te hian an ti ngei ang.
Tlai dar 5:00 a inkhel tan tur Manchester City leh Liverpool te hi season kal mekah vawi thum an inhmachhawn tawh a. Liverpool hian Premier League leh Community Shield-ah hnehna an chang a. Chak zawkah vawi hnih an tan tum hian Reds defender Virgil van Dijk chuan City goal thun khawl Erling Haaland a dang hneh viau. Etihad Stadium-a an inhmachhawn turah pawh hian Van Dijk-a’n Haaland a veng leh tur hi a hmuhnawm leh ngei ang. Liverpool nen an inkhelh hnuhnung berah City hian 3-2 in hnehna an chang a, League Cup atangin Reds hi an hnawtchhuak.
Manchester City leh Liverpool hi inelna hrang hrangah vawi 174 an inhmachhawn tawh a, vawi 81 zet Liverpool an chak tawh a. Vawi 46 an inhnehtawk laiin City hian vawi 46 hnehna an chang ve tawh bawk. Liverpool lakah Erling Haaland-a’n hattrick a siam thei a nih chuan English record thar siam in, season khatah inelna hrang hranga goal thun hnem ber a ni ang a, Salah leh Van Nistelrooy te record a khum chiah ang.
City mikhual tur Liverpool
![](https://theaizawlpost.org/wp-content/uploads/2023/03/cuty.jpg)