Civil mi za chuang thatah Sudan sipaite puh
Sudanese indona viltute chuan an ram khawthlang lama Darfur-ah sipaiin thlawhna atanga kapin mi za chuang an that niin a sawi.
Emergency Lawyers hian April, 2023 atanga Sudan-a tual chhung indona awm meka lehlam lehlamin dan bawhchhiaa an chetna an thlithlai reng a. Tur’rah bazar beihna hi ‘insuatna rawng tak’ tia sawiin mi za chuang an inhliam bawk niin an sawi.
Social media-a video thehdarh thenkhatah chuan bazara stall kang khu leh ruang kang chhe tak tak pawh hmuh theih a ni a. Video thenkhat hi indona kal meka sipaite beitu, Darfur hmun tam zawk thununtu, paramilitary Rapid Support Forces (RSF) an ni.
Sipai thupuangtu chuan civil mi an beih loh thu leh an hmelma chauh an kah thu an sawi thung.
Sudanese sipaite leh RSF hian civil mite awmna hmun bei thinah an inpuh tawn fo tawh thin.
RSF hian Darfur-ah hian drone an hmang a, sipaite hian indo thlawhna an hmang a, RSF tanhmunte an kap fo thin.
Tur’rah bazar hi sipaite awp hnuaia awm, el-Fasher khawpui atanga hmar lam km 35 vela hlaa awm niin engtik nia beih nge a nih leh thi leh hliam zat dik tak hriat a ni lo.
Darfur-a mihring dikna chanvo humhalhtu pawl pakhat, Darfur Initiative for Justice & Peace chuan beihna hi Thawhtannia thleng kha niin an sawi a ‘indona kal meka bomb-a inbeihna avanga thi an tam ber tum’ niin an sawi.
Sudan-a tual chhung indona nasa takah hian bomb leh laipui hmanga civil mite beihna hi tun hnaiah hian a nasa zual hle.
Indona a chhuah atang khan Sudanese maktaduai 12 velin an in leh lo an chhuahsan phah tawh a, tlanchhia hi Belgium rama cheng zat zet an tling.
Tam a tla a, ei tur nei lova awm an tam hle tih UN chuan a sawi a, an ram zahve aia tam chuan ‘ei tur kham khawp an hmu lo’ niin an sawi a. Indonaa thi hi a zat chiah hriat harsa mah se mi 1,50,000 vel tal an tling tawh tura ngaih a ni.
RSF hian Darfur-ah mi an suat a, civil mi sang tel thatin Arab ni lo hmeichhiate an pawngsual nasa bawk tia sawi an ni a, nasa takin an pha thung.
UN chuan Sudan hi khawvela mihring dinhmun khirhna ber a ni mek niin a sawi.
Civil mi za chuang thatah Sudan sipaite puh
