Hmanni lawka neih inang ten India danpui hnuaia dan hmanga nupa-a an insiam ve theihna tur kawng dapa Supreme Court hiala dan humhimna leh an dikna chanvo humhim sak tura an thlen chungchangah Chief Justice of India (CJI) D Y Chandrachud chuan a heng neih inangte chungchanga a ngaihdan sawi chhuakin constitution zulzui zelin thutlukna hi kalpui tur a ni a, chu chu ‘Chhia leh tha hriatna dik taka hman’ hi a ni tiin a sawi a.
“A nihna takah chuan Chief Justice-te hi minority te lamah an tang nghal ngawt lo a ni. Hun kal tawhah khan hetiang ang case pawimawh hi vawi 13 lai lo awm tawhin chief justices te kha minority lamah an lo tang tawh thin a ni. Ka rin dan chuan eng thil pawh nise ka chhia leh tha hriatna thiang tak ka hmang tur a ni a, Ka lo sawi tawhah chuan Ka ding nghet thin,” tiin CJI chuan Washington DC-a “Perspective from the Supreme Courts of India and the United States” tih sawiho-naah neih inang te chungchanga zawhnaah a ngaihdan a sawi a ni.
Zawhna a chhannaah CJI chuan he thutlukna a siam chhan sawiin roreltu (Judge) thutlukna chu mipui tam zawkte tan zawng lam awn zawng ringawt ni lovin ram danpui zulzui zawngin a ni tur a ni, chu chuan dan pui hnuaia zalenna te, intluktlanna te, in unautawnna te, freedom of speech and expression leh kan civilisation danglamna te a pho lang a ni, tiin a sawi a. Judge panga te rorelna hnuaia minority te chungchanga an ngaihdan sawiin, neih inang te hian an thiamthu sawi nan India dan hnuaiah tanchhan tam tak an nei ve a – zalen taka nun ve te, zalen taka thusawi leh an ngaihdan sawi te leh an chhia leh tha hriatna hman te hi, tiin a sawi a ni.
Chutiang zelin mi tlem zawk te leh minority te dinhmun chungchanga a ngaihdan leh mahni anpui nupa a insiam te sawiin, “India-ah chuan mipa leh hmeichhia te chu an inkawp remtih niin mahse neih inang te chuan an thei ve lo a ni. Engvangin nge heng mi danglam bik te inlaichinna tha tak nei an nih ve reng laia an dikna chanvo rah beh an nih? He dan khirh tak leh hnawk em em hi inneih chungchang ah rinawt a ni lo a, naupang chhawm chungchang ah te, ro sum chhawm te, thuam chhawm leh chhiah, etc., ah te niin dan hnuaia rorelnain kan tih theih loh India Parliament tihtur hi a tam em em a ni,” tiin CJI chuan a sawi a ni.
CJI-in neih inangte chungchangaa thutlukna sawifiah
