NBA 2024-25 season khel chhunzawm zel a ni a, season tharah Cleveland Cavaliers an khel tha viau a, tlawm an la nei lo. Cleveland hian harsa takin an khingpui Milwuakee Bucks an hneh. Cleveland an chak zel laiin Utah Jazz erawh chu season tharah an la tlawm vek thung.
Season tharah tlawm nei lo kal tluang mek Cleveland Cavaliers hian Bucks lakah bul an tan tha lova, quarter khatnaah point riat ngawtin an hnufual nghal. Bul tan tha lo mah se an insiamtha thuai a, quarter hnihnaah point 7 in an chungnung a, point khata hnufual chungin chawlhlawk an hmang.
Chawlhlawk hnu lamah Cleveland in an khel tha chhunzawm a, quarter thumnaah point liin an chungnung a, point thumin hma an hruai let. Quarter hnuhnung berah chak tumin an innawr tawn nasa hle a, inkhel hmuhnawm tak an lantir. Inkhel tawp nan second 10 chauh a awm tawh laiin Bucks in hma an la hruai mek. Hun tawp dawn tepah Cleveland tan Donovan Mitchell chuan point pawimaw tak a thawkchhuak a, point khatin an khingpuite an lehthal ta chiah. Bucks tan Damian Lillard chuan chakna point thawkchhuak leh teuh viau mah se a thelh hlauh thung. Inkhel hmuhnawm takah hian Cleveland Cavaliers chuan Milwuakee Bucks lakah point 114-113 in hnehna an chang zui ta a ni.
Inkhel hmuhnawm takah Cleveland chakpuitu Mitchell hian Utah Jazz atangin Cleveland hi a zawm a, a club thar tan a chetha rih hle. Bucks an lehthal tum hian point 30 a thawkchhuak. Bucks tan Damian Lillard chuan 41 a thawkchhuak a. Giannis Antetokounmpo pawhin point 34 a thawhchhuah bakah ball sawhlet vawi 16 zet a dawng tling bawk.
Bucks lakah an chak leh tak vangin Cleveland Cavaliers hi season thara an khelh hmasak pasarihah an chak vek a, hei hi kum 1976 hnu lamah bul an tan that ber tum a ni. Cleveland an chak zel a, Eastern Conference hmahruaitu an nih laiin Milwuakee Bucks erawh season tharah an khel tha lo viau a, an game hmasa parukah vawi nga tlawm tawhin Eastern Conference table hnuai ber dawttu-ah an awm mek a ni.
Inkhel dangah Western Conference lamah tlawm nei lova kaltluang mek Oklahoma City Thunder chuan an khingpui Los Angeles Clippers chu point 105-92 in an hneh. Inkhel dangah Denver Nuggets chuan an mikhual Utah Jazz chu point 129-103 an hneh a, Jazz hian season tharah chak an la nei miah lo. Nuggets an chak lai hian champion Bolton Celtics chuan season thara a vawi ruk nan hehna an chang a, an khingpui Charlotte Hornets chu point 113-103 in an hneh ve bawk.
Cleveland an chak tluang
