RK Dawla
Mb 9366095658
1. August thla laihawl kan thleng a, khua a favang chho tan a. Nikum leh kuminah Rawthing tâm rah tla a tam a, hei hian lui nungcha a hrai tlai viau niin a lang. A bikin chakai phei chu, aiawt tla kher lo pawh, rawthing rah tla ei pha chu an thau êm êm vek mai. Sazu hnuhma hmuh tur a la tam lova. Rawthing rah tla hi a riral hunah zuva a nghal viau ang em tih ngaihtuahtham tak a ni mêk e. Kan rua neihsate zingah rawthing hi a âwm a khauhin châk chi hrang hrang atâna hman tlâk ber pawl a ni a. Hetia a tâm vanga a rah tla tiak tam lai hian, a hmun siam leh phun darh awlsam hun lai a ni a. A bikin rua awm lohna hmun tam takah chuan, sum hnâr tha tak tur a ni ngei ang, rawthing huan siam hi. Chubâkah, ramngaw siamna tha tak a ni nghal dawn a. Tin, thing hmanga plantation siam ai mahin, mau leh rua plantation hi a sustainable zawk a, a puitling hma zawk bawk a, intihhmuh chi tak a ni bawk. Kawngkam maia ram neite tân phei chuan, rawthing hmun siam hi thil remchâng tak a ni pakhat ve a. Thei ilo chîng ve duat a, enkawl mumal hman lutuk lo ang chi tân phei chuan, rawthing chin hian potential a nei sâng êm êm a ni. Tin, handicraft lamah pawh, thil chi hrang hrang atân rawthing hi first class material a ni ve hrim hrim bawk.
2. Khua a favang dawn tan a, mi tam tak chuan nakum hmalak dan tur kan suangtuah tan leh mêk ang a. Chutih ruala loh theih lohva kan ngaihtuah tur nia lang chu tlona (sustainability) hi a ni. Kan khawvel sik leh sa lo danglam chho mêk leh mihring pung zel avanga demand lo sâng chho zel mil tur hian, sustainable mindset kan neih a tul ta hle. Vawilehkhata thar nghek leh hralh teuh tumna salah kan tâng tam niin a hriat a, hetiang rilru ai chuan tlo leh daihrei zawka hmathlir neih thiam hi a hlu zawk a, a Pathian thu zawk êm êm. Bible chuan – Hausak phut tum mi chu hrem lohvin a chhuak lovang – a ti a. Vawilehkhata hralh nghek a, lei chhuah nghek hi chuan, sual rim a nam hma êm êm thin. Experience leh knowledge awm lutuk lova, farming-a khawsa hlâwk tur chuan, leitha hming pu ve si, lei tichhetu (chemical fertilizers) tam tak hman a ngai a, mihring leh nungcha dang hriselna tichhe thei thil herbicides, insecticides, synthetic hormones etc hman a ngai nasa bawk. A ram pumin kan buaipui êm êm sawhthing leh hmarcha pawh hi, market tha leh tlo tak nei tur chuan ORGANIC a ngai tho tho! Zofate hian thil hi kan ngaihtuah chian a ngai viau..
3. Kan la intihhmuh lutuk loh, hmachhawp tul tak kan neih bawk chu Integrated farming. Thlai chin ngawr ngawr piah lam hlek, nungcha dang khawi/vulh tel ang chi kha Integrated chu a ni mai a. A tirah investment chu a sâng hlek nâ a, Integrated system hi a rintlâk êm êm. Leilet kan nei ve thin a. Tui-purun a nghal êm êm. A vên nân, rim nam chum chum khawpa butachlor hman a ngai thin. Amaherawh chu, bial ko kan bel sâng deuh a, tui a lo thûk ta hlek a. Buh phun atanga chawlhkar hnihnaah grass carp 4-5 inches vela sei kan chhuah ta a. Tui-purun tiak tantir kha grasscarp khan chaw-ah an ring a, an thang duh êm êm. Chutih rualin butachlor hman a ngai tawh lova, tui-purun vanga buaina a awm ta lo thung. Sangha kan buaipui pah khan tui-purun kan buaipui tel reng a lo nia… A zângkhai ta êm êm. Hetiang deuh hian Integrated system adopt mai tur, kan location leh chhungkaw dinhmun azirin a awm fo thin. Chumi tak dap chhuak tur chuan, mi inhuam kan mamawh ta a ni. Phûl lam hi huanah kan ngah a, khau leh pangngang an nghal viau chuan, kan huan kha block-ah thenin, block tawp tawp khan shadenet zai phelin fencing siam a, rainbow rooster chhuah mai khan phûl kha artuiah kan chantir tihna a lo ni a. A tira senso (shadenet man leh fencing siamna hlawhfa rawihna) sâng deuh mah se, a hnu lamah chuan kan hlawkin kan lungawi êm êm tho. Hetiang hian Integrated farming idea, keimahni mil tur kan zawn thiam a pawimawh fo thin. Sawrkar emaw dept emaw agency emaw khan formula min rawn duansak dawn lo, keimahniin kan develop a ngai. Zofate kan harh a hun e.
CLIMATE SMART, SUSTAINABLE FARMING – 32
