RK Dawla
Mb 9366095658
1. Favang boruak nuam tak kan nghah mêk laiin fur tâwp lam ruah kan dawng thahnem ang reng a. Hei hian thilto chawrno a tireiin, a ei turin lungphur phengphehhlep lam chiten chi thlah an uar niin a hriat a. Tichuan, pangngang lam an hluarin an nghal rei deuh thin. Hei bâkah pangngang eitu savate kan suatin sik leh sa dik lo vangin an inthlah pung nêp thung a ni mahna. |hing-tàm vanga zuva-in thlai a seh thawm kan hre tan zeuh zeuh a, fur tantir ruh bawhawk uchuak vanga leimin khan hlet a la chhuah zui zel bawk a. Leimin leh tuilian thawm hriat tur a la awm zel bawk. Kan tlangram leh sik leh sa mil tura farming kalpui turin kan inherrem a tul thlu tawh hle.
2. Khawvel chhangkanna chuan Zofate pawh min fan chho mêk zel a. A thatna leh thatlohna kan tem kawp chho zel ang. Bairabi thleng chauha Rel naràn service thin kha, Aizawl kawtchhuah mai, Sairang thlengin Rel kawngin min pawh ta. Rêl naran mai ni lo, Rajdhani express thlengin kan ban pha ruau ruau tawh a. Mizoram ang, thawnchhuah tur pachhe ang reng tak, mamawh ngah tak si tân thil remchang lawmawm tak a ni àwm e. India khawvelah Rel service hian min dahtir ve tak tak dawn ta a. Hetih lai hian, state danga phurh chhuah tur thlai chin tur thar thiam lamah nasa taka tan lâk kan ngai tih a lang bawk. Items tam takah sawrkar laipuiin GST a tihhniam vang leh thil phurhna man tlawm (Railway) vangin vantlang khawsak pawh a ziaawm hlek turah a ngaih theih àwm e. Bilkhawthlir leh Vairengte lamin vai rim an nam aia nasa mahin Aizawl chhehvel chuan vai rim a nam chhoh kan beisei thei bawk ang.
3. Mizo tribal thliarkar rilru paih a, India hnampui vaiho ianga rilru zau leh hriam kan put chhoh pawh a ngai hle dawn a. Mizote hi insawithaih hrât tak, hlauh tur zawng rêng rêng, teirei peih lo tak kan tam hle a. Sakawlh hlau pawl te, khawchhak lungpui lum hlau pawl te, chutiang pawl chu kan awm nawk mai. Kan sakhaw Puithiamte meuh pawhin ‘BJP hlauh’ te min zirtir thûl! Kan pi leh pu atanga kan hnam ziaranga bet tlat ZU pawh, ‘sual tinreng bul’ tia puhin kan inhuatsiak a! Khawvel awm chhungin kan do rêm dawn lo tih hre reng chung pawhin, a lang a mawia felna ûmin wineshop pawh kan kalpui rei ngam lova. Chutih laiin kan rinchhan ber Bible-in ‘Tangka sum ngainat hi sual tinreng bul’ tia min hrilh erawh kan fiah hlei thei lo! Kan Pathian hian sakawlh te, UID te, BJP te hlau tur hian min duh mawlh lovang tih a chian tehlul nen! Hlauh tur dik Bible-in min zirtir hi pawm mai ila, kan ram leh hnam hian a ngeih zawk daih ang mawle..
4. Kan hma lawkah hian sawrkar hnathawk hlawh pung (8th pay) kan hmabâk leh mêk a. Kan ram budget hi sawrkar hnathawk, mi tlemtête hlawhah a kal nasa viau a. 8th pay kan hman leh meuh chuan mi rethei leh hausa kar hi a zau zual leh hlek dawn tihna a ni a. Kan hmabak a ko hle. A châng chuan, Dictator ram nih ve pawh a châkawm rum rum thin hial – thiamna hriatna lama pachhe ve tak, farmer tam berte dinhmun atanga thlir chuan! Ram inrelbawl dan fel lo hi a pawi tak zet a, ram economy nasa uchuak takin a nghawng thin. Farmer tenau tam tak tân, opportunity awm lo ve tak a ni, kan tun dinhmunah hi chuan. Hetih mêk laia farmer-te thawhrim rah ngawih ngawih, an sawhthing man hei leh chen sawrkarin a chingfel thei lo hi a run-awm hle. Kan duh leh ngaih pawimawh tak takah hi chuan, chhuanlam hi kan siam ngai lo viau ania. Kawng chhe uchuak te, naupang tribal scholarship la har lutuk te, wildlife guard hlawh tâng rei lutukte hi priority kan pêk loh vang tih a chiang a, sawrkar hnathawk pangngai hlawh la tlai nen a inang mawlh lo tih hi kan sawrkar pawh hian hre lul teh se. Mizoram nuam taka farmer-te hmakhua hi lo êng mawlh teh se.