Club World Cup-a inlan tur Real Madrid
Real Madrid manager Carlo Ancelotti chuan manager a nih hnua a vawingana’n Champions League trophy a chawi a, May thlaa an hlawhtlinna kha Spanish giants tana record siama European Cup tum 15 an chawina niin, kha hlawhtlinna an chan hnu khan Italian coach Ancelotti chuan khawmualpui hrang hranga club champion theuhte inelna ni thin Club World Cup thar khel tura sawmna an hnar tur thu a lo sawichhuak tawh a, mahse, tunhnaiah nakkum Club World Cup an khelh tur thu Bernabeu club leh an boss chuan an nemnghet leh lawi si!
Thawhtanni khan Italian newspaper Il Giornale an tihin Ancelotti an kawmna tichhuakin, tah chuan kum 65 mi hian Club World Cup an hnar tur thu a sawi nia tarlan a ni a, mahse, a hnu lawkah social media kaltlangin Real boss hian a thusawi chu a a ni lo zawngin an ziakchhawng niin a sawi a, a rilruin a kawhtir ang loin an ziak tih a sawi.
Manager ni chunga Club World Cup title vawithum hawn tawh Ancelotti chuan, “Real Madrid tana title lian dang lakbelhna hun remchang a nih dawn avangin he tournament hi khelh ngei kan duh a ni,” a ti.
Tarlan tawh thin angin, Fifa chuan Club World Cup hi tilianin, kum thar 2025 June ni 15 atanga July ni 13 chhungin USA-ah team 32-in Fifa huaihawt club inelna lian hi an khel dawn a, Europe atanga team 12 tling tawh zingah Real hi an tel nghe nghe.
Kalphung thara khelh tur Club World Cup-a inlan an tum chungchangah La Liga champion pawhin thuchhuah siamin, “Real Madrid hi englai mahin 2024/2025 season-a Fifa huaihawt Club World Cup thar khelh leh khelh lohah hian a inngaihtuahbuai lo tih kan tarlang duh a; kan ruahmannaa telsa a nih angin kan chhuak ngei dawn a, kan tel tur hi kan phur hle tawh a, trophy dang la leh chungin khawvel puma kan fansmaktaduai chuangte hi phurna thlensak leh kan duh a ni,” tiin.
Italian chanchinbu Il Giornale-in Ancelotti an interview-na an tihchhuahah chuan ti hian Real boss chu an sawitir a, “Footballer-te leh club-te’n he tournament hi an khel dawn lo a, Fifa pawh hian theihnghilh daih rawh se.
“Real Madrid match khat lek pawh hi maktaduai 20 hu a ni a, Fifa chuan he cup kan khel dawn a nih chuan heti zat sum hi min pek an duh a, vanduaithlaktakin, club dangte pawhin he cup khel tura sawmna hi an hnar ve dawn,” an tihtir!
Europe-a manager hlawhtlingberte zinga mi Ancelotti ber chuan chanchinbuin a thusawi an ziakchhawn dan chu a a dik lo tiin a tum loh dan deuhin an chhuahsak niin a sawi a, US tournament-a inlan ngei an tum thu a sawi hnu lawkah a club vawn mek pawhin thuchhuah siamin an tel tur thu an nemnghet ve leh ta a ni.
Club-te’n season khata match khelh tur an neih tam thin avang leh club lian zualte phei chu an hah zual avangin Fifa ruahmannaa Club World Cup kalphung thar zau huau hi sawisel pawl chuan an dodal thu an tilang tawh thin a, world player union Fifpro leh Premier League pawh an telna World Leagues Association (WLA) pawhin he ruahmannaah hian Fifa rawn an hlawh lo tih an sawi a, hei hi Fifa chuan an pha thung.
Tournament duh lotu langsar zingah Premier League chief executive Richard Masters pawh telin, football calendar chep lutuk chu hun awih rei zawk tur Club World Cup thar an tuipui loh chhan niin a sawi.
Thla hmasa khan Fifa president Gianni Infantino chuan Fifpro leh WLA-te chu he tournament chungchanga inhnialna hriam tak awm reng titawp tawh turin a sawm nghe nghe.
Infantino chuan, “Kum li dana khelh tur Fifa Club World Cup tharah hian team 32 an inlan dawn a, tournament chhungin match 63 khelh a ni dawn a, heti zat hi tournament vawikhatah game khel dawn mah se khawvela top club-te inkhel hi 1% vel bak Fifa hian a huaihawt (organize) tling lo.
“Match dang 98, 99% tih angte chu league hrang hrang, association leh -te huaihawt vek a ni.
“Tunah hian season khata an match khelh zat atangin one or two per cent lek Fifa chuan a huaihawt ve chauh dawn a ni,” a ti.
Club World Cup-a inlan tur Real Madrid
