Club World Cup-a kan hmuh tur thenkhatte

Club World Cup-a kan hmuh tur thenkhatte
Thla khat zet awh tur Club World Cup chu Pathianni atang hian nakkum World Cup nghahna tur ram pui ber tur United States khawpui 11-ah team 32 zetin an khel chho tan muah muah dawn a, July ni 13 thleng awh tur he tournament-a kan player hmuh tur hraw zual thenkhat thlirho teh ang.
Big name an tih chin zingah Real Madrid star Kylian Mbappe, Inter Miami captain Lionel Messi leh Monterrey defender rothap Sergio Ramos tihte an tel.
Kumin Club World Cup hi he tournament khelh tawha chhuak an la tam ber tum tur niin, football-a hming hraw ber ber-te kan hmu thei dawn a, mahse, Fifa lamin hnawhluh ve hram dan an zawnpui Cristiano Ronaldo erawh chuan duhsakna hnarin tel a tum loh thu a tichiang tawh thung.
Football superstar rual zinga Messi kan hmu thei tur hi he tournament tihlutu pakhat a nih hmel.
MLS regular season-a chetha ber (best performance) an nih avangin Inter Miami hian Major League Soccer Supporters’ Shield an chang a, MLS play-offs hnehtu zawk ni mah se LA Galaxy chuan Club World Cup an khel pha dawn ta lo a, hei vang hian US lamah Messi a inlan thei dawn ta a ni.
Ballon d’Or chawimawina vawi riat dawng tawh Lionel Messi a inlan theih dawn rual hian Barcelona lama a khelhpui dang pathum – Liverpool striker hlui Luis Suarez, midfielder Sergio Busquets leh left-back Jordi Alba-te nen Inter Miami tan an inlanho thei dawn a ni.
He legendary quartet-in Barcelona thuam an inbelho laia an hmelma lian ni thin defender Sergio Ramos kha tunah Mexican club Monterrey player niin Club World Cup-ah a inlan dawn a, Spain tana World Cup trophy hawn tawh hi a khelhna club-ah captain a ni nghe nghe.
Anniho bakah hian striker Oliver Giroud leh kum 2018-a France World Cup-winning team-a tel goalkeeper Hugo Lloris pawh kha Los Angeles FC thuam inbel chungin kan hmu dawn a, play-off lama Mexican side Club America an hneh avangin Club World Cup khel tur zingah an tel.
World Cup winner dang pahnih Kylian Mbappe (Real Madrid) leh Antoine Griezmann (Atletico Madrid)-te pawh kan hmu dawn.
English team pahnih Manchester City leh Chelsea pawh US tournament khel tur zingah telin, City lamin Tijjani Reijnders, Rayan Ait-Nouri, Marcus Bettinelli leh Rayan Cherki-te squad-ah an telh a; Chelsea lamin nipui thawt laia an lakluh Liam Delap, Dario Essugo leh Mamadou Sarr-te an hruai dawn bawk a ni.
England international rual khat – Harry Kane, Conor Gallagher leh Jude Bellingham-te pawh Bayern Munich, Atletico Madrid leh Real Madrid tan an khel ang.
Real hian England right-back Trent Alexander-Arnold an chhawr thei dawn a, Reds lama a contract tawp hma thla khat la awmah Liverpool atanga pound maktaduai 8.4 senga an lakluh hman avangin US-ah an chhawr thei dawn a ni.
Spanish giants hian thla hmasa maia Bournemouth atanga pound maktaduai 50-a an lei chhuah centre-back Dean Huijsen pawh squad-ah an telh.
Chelsea England quartet Cole Palmer, Reece James, Levi Colwill leh Noni Madueke-te pawh United States-ah an zin dawn a ni.
Hetih lai hian Phil Foden, John Stones leh Rico Lewis-te pawh England international zinga Manchester City tana Club World Cup khel tur an ni a, club lama hmalam dinhmun a chian rih loh avangin Jack Grealish erawh squad-ah telh a ni ta lo.
United States tournament lianah hian European team 12 an inlan dawn a, tunhnai kum nga liamta chhunga Uefa competition-a an chetthat dan azirin Club World Cup khel thei tur hi teh a ni.
Chelsea hi kum 2021 Champions League title an lak avanga khel thei an nih laiin Manchester City erawh chu mi hnu kum hniha an champion vanga tling an ni thung a; 2025 Premier League champion Liverpool leh Champions League semi-finalists Arsenal erawh Club World Cup khel turin an tling lo thung.