Africa khawmualpui lamin a tum thumna atana Club World Cup final khelh an beiseina titawpin Nilaini zan Rabat khaw semi-final match-ah Europe champion Real Madrid chuan 4-1-in an khingpui Al Ahly an sawp a, naktuk zan final-ah Saudi Arabian club Al Hilal an hmachhawn zui leh ang.
Morocco khawpui Rabat-a Club World Cup semi-final match-ah first half chhungin Real Madrid-in goal an khung hman dawn lo emaw tih hnu minute 42-ah Vinicius Junior chuan Bernabeu club hmahruaina goal thunin, second half tir lam minute 46-ah Federico Valverde chuan European club goal hnihnaa thawh zui zat.
Chutah Egyptian club Al Ahly lamin an siphurh pakhat sut thenna hun remchang hmuin minute 65-ah Eduardo Camavinga chesualin, box chhungah Hussein El Shahat a titlu a, veteran Tunisia international Ali Maaloul chuan penalty thelhin, Mohamed Afsha chuan siphurh sutna hun remchang a hmu ve leh a, mahse, Hussein El Shahat leh substitute Percy Tau-te’n Real Madrid tlarhnung an tihbuai kara a chance neih chu hnai set sawt atangin a bawhpelh.
Hun pangngai tawp hma minute thum chiah awm tawhah tum 14 ngawt European champion ni tawh Madrid club lamin an goal thumna thun turin chance an hmu ve leh a, mahse, Al Ahly goalkeeper Mohammed El Shenawy chuan Luka Modric-a penalty a dansak.
Hun pekbelh minute hnihna a kal mek laiin Rodrygo chuan Real goal thumna a tilut a; minute 98-ah substitute Sergio Arribas chuan chiang lehzuala Carlo Ancelotti team chakna goal thawh ve lehin, final lut zo ta lo Al Ahly hian Inrinni zan third place play-off match-ah Brazil club Flamengo an hmachhawn a ngai ta a ni.
Al Ahly coach Marcel Koller chu an team tlawmnaah a lawm lo hle a, a bik takin second half-a an tlarhnung pherh leh an chance neih ho an hloh danah a lung ni lo zual a, Inrinni zan pathumna zawn hunah chuan Brazilian club tha Flamengo laka inrintawkna an neih a pawimawh thu a sawi a, an inkhelhna khelmual thoa Al Hilal an hmachhawn dan an hmuh vek avangin Brazilian-ho lakah an fight ngei tur a ni tiin a naute a fuih.
Africa khawmualpuia team hlawhtling ber leh khawvel huap pawha hlawhtling ber pawl tling pha Al Ahly hi he tournament-a semi-final khel hlun an ni.
|um 10 zet African champion ni tawh Egyptian club Al Ahly hian khawmualpui hrang hrang champion theuhte inelna he tournament-ah hian European team an hmachhawn tawhte an la hneh ngai lo tluang zel a, kum 2006, 2020 and 2021 khan pathumna an lo ni ve tawh.
Kum 2010 final-a chak lo zawk DR Congo club TP Mazembe leh kum 2013 runners-up Raja Casablanca of Morocco-te kha he tournament-a Africa aiawh chetha ber pahnih an la ni a, he khawmualpui atang hian champion an la chhuak lo.