Club World Cup vanga chawlh hmang rei lo player-te

Club World Cup vanga chawlh hmang rei lo player-te
A hma zawnga khawmualpui champion club theuhte leh club sawm bik tlemte inelna ni leu leu thin Fifa Club World Cup kha club football-a huang zauh ta vak Fifa chuan kumin atangin team 32-ah a khel thei team zat a tipung vak mai a, a hma pawha nipui chawlh thlahlel player-te’n an sawisel nat tawh tehlul nen kumin phei chu a dam rei club leh player-te tan inkhelh hun chhung a rei lehzual dawn a, sawiselna thawm pawh hriat tur a awm leh mek.
Tarlan tawh thin angin, June ni 14 atanga July ni 13, 2025 chhung awh tur United States-a khelh mek Fifa Club World Cup hi kum hmasa lamahte kha chuan FIFA confederation paruk atanga team pasarih chhuakin an khel thin kha a ni a, a thlengtu pakhat kha an awm mai a, ni 11 lek chhungin match sarih an khel a, an zo fel hmul fai mai thin a, kuminah erawh chuan thla khat an khel tling thuak dawn a; sawiseltu langsar zingah Brazil leh Barcelona forward Raphinha a tel.
Brazilian hian Club World Cup avanga an nipui chawlh hman pawhtawi a nih chungchangah he tournament khel tur player-te’n rawn an hlawh lo tih sawichhuakin, May thla nawi lama zawh fel European league season tawp hnu lawka club inelna hmachhawn zui leh ngai chu player-te’n an lawm thang huam lo niin a sawi!
Rapinha chuan, “European team tana khelte chuan season chawlh an hman laiin Club World Cup khel tura an kirleh rih a ngai a; Paris St Germain tana Champions League trophy hawn hlimhlawt Marquinhos leh Beraldo-te pawhin mumalin champion an la lawm hman lo.
“National team-a an lo luh a ngai a, chu mi zawhah Club World Cup khel turin an chhuak leh a, chawlh hi an nei hlawl lo.
“Mi tam tak chuan hei hi player-te chhuanlam mai mai niin an sawi a, a ni emaw ni lo emaw kan remtihna la hmasa miah loa chawlh kal lai tawpsan ngai hi a buaithlak a, kan thutlukna hi kan right a ni ve bawk. Mi zawng zawng hian thla khat tal chawlh chu kan phu vek a, chutih laiin tam tak hi chuan heti zat chawlh hi an nei tling lo nasa,” tiin Club World Cup avanga player thenkhat hah belhna a sawichhuak.
European league lian zual tam zawk chu August thla laihawl emaw thla nawi lamah emaw khelmualah an kirleh tawh mai dawn a, season thar atana inbuatsaihna phei chu he mi thla tir lama tan fel leh diam tawh tur a ni.
Raphinha bawk hian a chipui hming a tarlante chungchang sawizawmin, “PSG hian Club World Cup final an thleng a nih chuan Super Cup an khelh chhunzawm leh a ngai dawn a, an tan chawlh tak tak a awm thei lo ang.
“Thlirna hrang hrang a awm thei ang a, kei, ka thlirna atang chuan tihluihnaa i khelh ngei ngei ngai tournament avanga chawlh hman lai kalsan hi a tha lo takzet a; tu player-te mah hi kan duthlannaa khel kan ni lo a, Club World Cup khel tur hian biakrawn eih kan ni lo. Kan duh leh duh loa innghat ve tur chu a ni maw le,” a ti.
Europe season thar hawnna Super Cup-ah August ni 13 khian Champions League trophy hawntu PSG hian Europa League champion Tottenham Hotspur an hmachhawn dawn a ni.