Ram pawna Mizo thalai hnathawka tirhchhuah zinga harsatna tawkte tanpui a, hruai haw turin Congress Thalai chuan Home minister an pun a. Chief minister-in hma a lak theih loh avanga an beidawn thu an hrilh.
Congress Thalai hruaitute hian Nilaini khan Home minister K Sapdanga a office-ah hmu in, a. Dan dik lo leh kum tling loa ram pawna hnathawk tura thawn chhuahte harsatna chingfela hma la tura ngenna ziakin an thlen. India danin naupang kum tling lo hnathawka chhawr a phal loh lai leh passport dik lo (lem) hmanga hna thawk tur inthawnchhuahah thil dik lo titute an phu anga hremna pe a, a tul anga hma la turin April 28 khan chief minister hmuin ngenna an thlen a. Sawrkarin a tul anga hma a lak tur thu leh agency-te titawp nghal tura a tih thu a lo hrilh chungin, thla khat dawn a liam hnuah pawh hmalakna mumal a awm loh bakah thil dik lo titute hremna mumal tak a awm lo nia an hriat thu an sawi.
‘Hei hian chief minister-in dan leh thupek a ngaihpawimawh loh zia, a enkawl mipui himna a ngaihpawimawh loh zia leh thil tak tak ti tlak a nih loh zia a tichiangin kan hria a. Home minister i nih ang leh chief minister aia harsatna chingfel rang thei zawk tura kan ngaih vang che in hma la turin kan ngen che a ni,’ an ti.
Tunhnaiah Talmud Employment Agency chuan kum tling lo ram pawnah hna thawk tura an thawn avangin kumin May 10 khan CID Crime Branch-ah FIR thehluh a ni tih Congress Thalai hian sawiin, harsatna tawk kum tling lo hi visa status local authority-ten an endik a, visit visa thlakhat dam tura UAE lut a nih bakah resident visa (sponsor visa) kum hnih dam an lo chhu (stamp) hman tih an sawi. ‘He thilah hian chief minister rintlaka loh avangin Home minister i nih anga a ranglama chinfel a nih theihna’n hma la tur leh thil dik lo titu agency-te hi man a, hrem turin kan ngen che a. Harsatna tawk naupangte hnen atanga Rs. 30000 an laksak pawh a rang lama pek let an nih theih nan hma la turin kan phut che a ni,’ an ti bawk.
Kumin May 1-a Mizoram Police thuchhuahah, Syria-a hna thawk tura thawn Mizo hmeichhe naupang pathum, harsatna tawkte hruai haw an nih tur thu leh Syria-a Indian Embassy pawh dawr a nih thu tarlan a nih laiin, Syria-a Indian Embassy-in Mizoram sawrkar emaw Ministry of External Affairs atangin emaw official-a biak an la ni lo tih an sawi bakah harsatna tawk naupang pathum, vawiin thlengin biak an la ni loa, Mizoram atangin agency-te leh CID nia inchhalten mumal lo taka an biak bak engmah hmalakna a awm zui lo tih Congress Thalai hian an sawi. He thilah pawh hian mangangte harsatna chingfel turin an ngen tih an sawi a ni.
CM-a beidawng MPYCC Home minister hnenah kal
