CM adviser-in hralh leh hawh a hrehrang lo a ang
– Lal Thanzara
Chief minister adviser-in Lengpui Airport ram Air Force kuta hawh tir chungchang a sawichhuah duh dan chu hawh leh hralh hre hrang lo a ang tih Congress hruaitu Lal Thanzara chuan a sawi.
Zirtawpnia Congress Bhavan-a inkhawmah MPCC president Lal Thanzara hian Assembly House-ah chief minister adviser-in kum 2012-a airport sir hmun hnihah Air Force-in blast pen atan an hman turin ram acre 32.66, kum 50 atan cheng khat chauhin an hralh a. A hralhtu chu Congress a ni, tia a sawi thu sawichhawngin, “CM adviser meuh si hian hralh leh hawh (sold leh leasing) a hrehrang lo emaw ni,” a ti.
Ram venhimna atana pawimawh an tih vangin Air Vice Marshal-in lehkha in Mizoram sawrkar a lo dil a, indo thutah jet fighter lokal ngai se, thuhruk theihna tur hmun siamsak turin a rawn ngen a. Ram hnuk hkhawih a ni a, India ram pum himna atana duh an nei a nih chuan, tiin Congress sawrkar khan hmun a lo pe a, sum duh vanga ti an ni lo, a hmingin cheng khat chawiin lo nei ru an va ti pawh a ni lo tih a sawi.
“Aviation hotuten an duhthua hmun an pek mai theih a ni loa, airport license min petute hnenah phalna min pek a ngai a. Chutiang phalna chu lo buaipui teh u, tiin khatih laia kan hotute khan an ziak a ni. Phalna an pek hnuah leh lo buaipui rawh u, an tih pawha IAF-in an buaipui ta loa, kum engemawti chhung hun a kal hnuah, MNF sawrkar lai khan kan inhawhtirna kha tihtawp a ni,” Lal Thanzara hian a ti.
House zahawm takah Congress-in kumkhatah cheng khat lekin kum 50 atan a hralh, han tih bawng bawng na chi a ni lo, tiin, “Kan thil hriatchian reng a leila zawnga kan sawi duh talh zel dawn chuan ZPM hian Pathian ram an thlentir loang tih ka hlau khawp mai,” a ti.
“Mawl hralh a ni lo, mawl hralh niawm taka min chhuah kha a tlawmthlak a, kum 50 atan cheng khatin an hralh, han intih kha a politician thlak nge politician loh thlak pawh ka hre lo,” Congress president hian a ti.
CM adviser-in hralh leh hawh a hrehrang lo a ang – Lal Thanzara
