CM hnatlang…. zahthlak…tlawmthlak…

Chief minister meuh lui kawr bawlhhlawh leh rimchhe tak, kutlawnga ham bawrh bawrh ngaia hnatlan a ngai tlat mai hi, a zahthlak hle. Hnatlanga chief minister a thawkchhuak ve hi a zahpuiawm lam ni lovin, chief minister meuh hnatlan ngaia bawlhhlawh sawngbawl kawnga mipui kan la hniam lutuk hi a ni, zahthlak zawk chu.
Chief minister hi chuan a ti ropui, a fakawm; miin fak se tih a duh vanga hnatlanga thawkchhuak hi a ni mai lo tih chu, minute sawm chuang zet, tui dai chung leh, bawlhhlawh rimchhe tak tak a ham bawrh bawrh thei khan, lem a chang satliah mai lo tih a hriat awm e.
Faina hapta hman changa kawngpui fai laia phiahfai tur bawlhhlawh chhawpchhuahsak chawp ngai a ni lo hi, a ropuina leh a fakawmna a ni.
Eng vangin nge chief minister hian hetianga a tih tak chiam mai le? State pakhat hruaitu lu ber a ni a, hnatlannaah inhliam palh thei a ni a, lo inhliam palh ta se, a mawhphurhna leh tihtur hlenchhuah tur tam tak a tih theih loh phah hlauh chuan, sawrkar leh mipui tan a pawi thui thei dawn hle a ni.
Kan ram luidung leh kawr dung, khawlai, a englai mai pawh hi a bawlhhlawh ta em em mai a, kan tui tlan mek lui dungte chu bawlhhlawhin a hnawh ping lo chauh tawh a. Save the Riparian ten thawm lian tak an rawn chhuah a, lui dung thianfaiin hun rei tak an lo hnatlang tawh a, hei hian mimal, pawl leh sawrkar a rawn kangkai ta a. Lui dung bawlhhlawh thianfaia hnatlang neih mek laiin Thenkhatin ek thli an la rawn bun chhuak duh ta zel a, kan fai lo mai ni lovin, kan bawlhhlawh a, kan uih hluah hluah ani ta ber awm e.
Hei hi a manganthlak takzet tawh a, thu Tha inhrilhin awmzia a nei thei tawh lova, awareness campaign lahin awmzia a nei thei tawh hek lo. Chief minister hial a hnatlang ta… tih hian bawlhhlawh thehdarhtute ngeng chhunin an thil tih dik lohte simin khua leh tui Tha nih duhna thinlung an lo pu mial dah lawm maw tiin, chief minister meuh a hnatlang ta rawih mai a ni ber awm e. Hei hi mipui tan a tlawmthlak hle.
Dik lo taka bawlhhlawh thehthangtute lam thenfai tum lova, an tih bawlhhlawh thenfai reng ringawt hian awmzia a nei thui tak tak lo tih chu a lang tawh a. Chuvangin, khauh deuh zawka beihpui thlak law law hi nakin hun zel atana kan That tlanna tur a ni zawk awm asin.