Lungleia kal chief minister Lalduhoma chuan Thawhlehni zing khan Baptist Church of Mizoram Hqrs office Serkawn Lunglei tawngtai inkhawm a hmanpui a. Amah bakah minister dang – K Sapdanga, Vanlalhlana, Lalrinpuii, Lalthansanga, B Lalchhanzova, Lalnghinglova Hmar, MLA te – V Malsawmtluanga, T Lalhlimpuia leh Lalramliana ten an tawiawm.
Chief minister chuan BCM office a tlawh hmasakin an lo tawngtaisak a. Tunah hun tha buatsaihsak leh a, an tawngtaipui leh chu a lawm hle tih a sawi.
‘Kan ramah Pathian ram lo thleng se’ tih chu an policy pawimawh bik pasarih zinga a hmasa berah an dah thin tih sawiin, “Ram hmasawnna hna thawk turin sawrkar, kohhran leh tlawmngai pawlte kan pawimawh a. BCM pawh thlarau lam rawngbawlna bakah education, orphanage home, ruihhlo ngai enkawl leh skill development lamah tha taka hma in la hi a ropui hle a ni,” a ti.
Sawrkar enkawl zirna in aia kohhran enkawl zirna in chu kawng tam takah an that zawk fo avangin kohhran enkawl zirna inte thawhpuia tanpui dan tur an dap dawn tih chief minister hian a sawi a. Ruihhlo ngai enkawl leh ruihhlo do thua sawrkar ruahmanna sawiin, kohhran hrang hrangten thawhhona tha zawk neih theih zel tha a tih thu a sawi, MPF awm lohna khuaah MLA candidate-te tan campaign-na senso a sang bik thin tih a tak ngeiin a hmu tih a sawi bawk.
BCM asst GS Rev R Lalnunzira chuan BCM-in sawrkar a beisei dan leh a duhsakna a sawi a. Rorel tura lal ringawt loa, lal bawk hna thawk bawk an nih an beisei thu a sawi.
CM-in BCM office a tlawh
