CM-in bill a putluhah mawh la ngam rawh se
– Lal Thanzara
Mizo inneih leh ro luahna dan siamthatnaa chief minister-in bill a putluhah midang puh loin mawh la ngam se an duh tih Congress hruaitu Lal Thanzara chuan a sawi.
Thawhtannia Congress Bhavan-a inkhawmah MPCC president Lal Thanzara chuan, Assembly House-a pass tak ‘The Mizo Marriage and Inheritance of Property (Amendment) Bill 2026’ ah bill puluttu chief minister-in ‘Mizo hmeichhiain hnamdang pasal an neih chuan Mizo an nihna a tawp nghal’ tia a sawi chuan Mizo tam tak thinlung a ti nâ a. Nasa taka dodalna a lan tak avanga ni hnih hnu lekah CM vekin ‘sawrkar tih a ni lo’ tia NGO-te pressure avanga bill pulut a nih thu a sawi ta daih chu mawhphurhna lak ngam loh vang a ni tih a sawi.
CM bill putluh, House-a pass aia sawrkar tih thildang a awm thei lo, tiin, chief minister-in a hmalaknaah midang dem tur zawng loin mawh la ngam turin an duh tih a sawi.
“Hnam hi thisen vanga kan neih a ni a. India danpuiin a tihdanglam theih a ni lo. Mizo hmeichhiain tupawh pasalah neiin state dang leh ram pawnah pawh awm se, Mizo a ni reng ang. Mizo danah Mizo hmeichhiain pasalte hnam an tawm ngai lo,” a ti.
Assembly Session-ah vek Sairang Rel Station-a bazar nî siam sawimawi a ni pawh tha lo an tih thu MPCC hruaitu hian a sawi. ‘Bazar nî’ siam a nih chuan ‘Vai sumdawnna Ni’ kan siam dawn tihna a ni, tiin, “Mizoram sum luanralna nî a ni bawk ang. Mizo chawhmeh lei turin Vai an lo kalkhawm dawn loa, chawhmeh leh bungrua, thawmhnaw zawrh tur an rawn keng lut teuh dawn. Sumdawnnaa min chimralna tur kawng khat a ni thei. Mizo sumdawngte tan a tha loa, mahni thlai thar zuarte tan a tha lo. Sawrkar hian ti lul suh se,” a ti.
CM-in bill a putluhah mawh la ngam rawh se – Lal Thanzara
