Kar kalta Inrinni khan Chungtlang Lo Zawh Organising Committee leh tour operator ‘Evergreen Tours & Travels’ ten an buatsaih, Chungtlang Zau Lo zawh chu Chief Minister Lalduhoma’n a hmanpui.
Chief minister hi Lalthansanga, Soil & Water Conservation Minister, PC Vanlalruata, Agriculture & Farmers Welfare Minister, Lalrinpuii, Tourism Minister leh Lalmuanpuia Punte, Adviser to CM leh official thenkhatten an tawiawm a ni.
Chief minister chuan sawrkar flagship programme Handholding Scheme chu tun thlaa hawn hman tum a nih thu sawiin, he scheme hnuaiah hian Chief Minister Special Scheme a awm dawn a ni, a ti. Hmalakna tur azirin cheng nuaih khat thleng dawn theihna tur a ni, a ti bawk.
Chief minister chuan handholding scheme hnuaiah loan cheng nuaih sawmnga thleng puk theihna a awm dawn tih sawiin, chutah chuan guarantor-ah sawrkar a tang ang a, a thawk thate chu loan interest zawng zawng tumsak an ni ang, a ti a. Hetiang hmalakna hi India rama kalpui thei awm chhun kan ni dawn a ni, a ti bawk.
Mipui sawrkar a nih ang ngeiin tumah thlei bik nei lovin, a ti tak tak tur an nih phawt chuan Handholding Scheme hi tu pawhin an dil thei ang, tiin Mizoram hmasawnna tura sawrkar ruahmanna a sawi a. Mipuite taihmakna ram, hlawhtlin tuma bei tak tak tamna ram hi ram changkang leh hmasawn an ni zel a. Chutiang mite chu a tahtawlin an banah kaiin kan khaichhuak dawn a ni. Kan hlawhtlin ngei kan ring. Kan sawi tawh thin ang khan thlai thar pali kan thlan te kha a rate kan puan ang khan sawrkar chuan support price a pe dawn a. Tuten emaw sawi pawr an lo tum a nih pawhin lo awih suh u. Sawrkar chu a dinna ngaiah nghet takin a ding reng a ni, a ti.
Chungtlang chu Rubber ching tam khua an ni tih sawiin, kalphung thar mipui sawrkar hian rubber hi kan ngaihpawimawh avangin Chief Minister Rubber Missions kan kalpui tan a. In khuaah hian hmalakna tam tak kan nei chho zelin a rinawm. In eizawnna lam enkawltu department minister ten in mamawh te, in harsatna te a hmun ngeiah an rawn hmu a, hei hian rah tha a chhuah zel ka beisei, a ti bawk.
Vanlalpeka, VCP Chungtlang, Lo Zawh Organising Chairman ni bawk chuan Lo zawh programme an siam theih nana thawhpuitu Tourism Department leh an hnuaia Tour Operator Evergreen Tours & Travel chungah te, Agriculture leh Sericulture Department chungah te lawmthu a sawi a ni.
Chungtlang hi Mamit district, Reiek thlanga awm a ni a. Chhungkaw 100 vel an cheng mek a. Eizawnna lamah lo nei mi an la ni deuh vek a, an khaw ram tlak lama Tut lui phaiah chhungkaw 80 velin Rubber kung 50,000 chuang an nei mek a, Mizorama Rubber Cluster lian ber niin an insawi. Chhungkaw 70 vel chuan Rubber hi an hnai tan tawh a ni.
CM-in Chungtlang lo zawh hmanpui ‘CM Special Scheme’ a awm dawn: Duhoma
