CM-in Covid laia kan sum dawn
kim loh a zuk dil kha a zahthlak
– Zoramthanga
Covid-19 len vanga state-in centre atanga sum kan dawn tur min pek kim loh, kum 5 liam hnua tuna Mizoram chief minister-in Union Finance minister a zuk dil leh kha thil zahthlak tak, budget awmdan leh a kalphung hriat loh thlak a, a zahthlak hle tih chief minister hlui Zoramthanga chuan a sawi.
Zirtawpnia Mizo Hnam Run inkhawmah MNF president ni bawk Zoramthanga chuan, 2019- 2020 sawrkar kum chhunga sawrkar laipuiin budget estimate (BE) Mizoram a rawn pek theih an beisei vaibelchhe 3885.19 ah vbch. 3017.8 chauh a rawn pe a. 2020-2021 ah BE vbch. 3967.796 ah vbch. 3010.55 chauh pe in, BE hisap a tlin phak lohna vbch. 1824.8 hi min pe leh turin chief minister Pu Lalduhoma chuan a zuk dil tih a sawi.
Union Finance minister Nirmala Sitharaman chuan Mizoram CM hnenah, Covid kum a nih avangin chhiah tlingkhawm hmuh an beisei ang an hmu zo lo nasa a. BE pha zo loin 2019-2020 revised estimate (RE) ah vbch. 3017.80 Mizoram-in a hmuh a ngai ta a. Chutiang bawkin 2020-2021 a BE pha zo loin RE-ah vbch. 2782.86 kan hmuh a ngai a. Chuti chung chuan sawrkar kuma pek tur, chumi kuma lakkhawm kim hman loh avanga a kum leh lama chumi kum hming thoa pek thin (actual) vbch. 2019- 2020 ah vbch. 125.72 leh 2020- 2021 (actual) vbch. 338.30, a vaiin hemi kum hnih atan vbch. 464.58 a rawn pe leh a. Chuvangin Mizoramin chhiah lakkhawm (share of taxes) atanga a dawn tur pek kim loh an nei lo, tiin a rawn chhang tih a sawi a ni.
Hetihlai hian ZPM thupuangtu chuan RE aia actual-a a tamna hi Covid vanga sawrkar laipuiin min pek belh leh chu MNF sawrkarin a zep ru ni ang hrima sawiin, a hmanna min rawn zawt ta chiam tih MNF hruaitu hian sawiin, “Hei hi state-in central atanga share of taxes a dawn pangngai reng a nih avangin, state zawng zawngin share of taxes an hman dan pangngai thoa hman vek loh theih loh a ni. Hlep ruk emaw zep ruk emaw rual a ni loa, hetiang tho hi state dang zawng zawng kal dan vek a ni,” a ti.
Covid chu khawvel pum leh India sawrkar pawhin a tuar nasa a. MP fund pawh vaibelchhe tam tak sawrkar laipuiin a pek loh phah a. Mipui atanga chhiah hmuh a tlak hniam phah nasat avangin state-ten kan hmuh tura beisei kan pha lo nasa tih Zoramthanga hian sawiin, “Hetiang chunga kum 5 liam hnua lo zu thin that leh kha tu state chief minister mahin an tih a rinawm loh. Union Finance minister pawhin chiang kelh kawlhin a rawn hrilhfiah ta a ni. State dang CM-te hian an hre zau ang tih a hlauhawm a, a zahthlak deuh lam a ni,” a ti
Tun hnuah Pu Lalduhoma sawrkar chu budget awmdan leh kalphung chiang zawka zir hmasa tura chahin, chutiang bawkin party thupuangtute pawhin mipui vantlang hmaa thu mawl leh a tak, a hriaten an nuihpui nghek nghek tur ang chi puang chhuaka mi puh kual tawh lo turin hrilhfiah hmasa se tha tih thu a sawi bawk.
CM-in Covid laia kan sum dawn kim loh a zuk dil kha a zahthlak – Zoramthanga
