Chief minister Lalduhoma chuan YMA member-te chu eirukna dopuiah a sawm tih a sawi a. Mahni chhungkuaa bul tanin eirukna suma lei thil duh lo ngam turin a ngen tih a sawi.
Chengkawlawn Run Sakawrdaia YMA Inkhawmpui lian vawi 75-na neih zan hnihna, Nilaini zan vantlang inkhawmah chief minister chuan, YMA chu mipui thlamuantu a nih avangin mitin tana pawl tangkai a ni tih a sawi a. “Ramria kan buaiin YMA in lo lang a, khuarel chhiatna kan tawhin YMA hmel kan hmu a. Zofate insuihkhawm kawngah nise in tangkai reng thin,” a ti.
Hnam zia leh tih dan vawnhim kawngah YMA-in a thawhhlawk thin a. An hmalakna tichak turin sawrkar chuan Thingsulthliaha YMA rama centre sakna atan cheng vaibelchhe 100 a ruahman tih a sawi a ni.
YMA leh sawrkar thawh dunna – Ruihhlo Do Task Force an tinung thar a, Hulhliap Short Stay Centre an kalpui dun a, Operation Jericho an kalpuiho mek bawk tih chief minister hian a sawi.
“Security Coordination Committee thutkhawm hnuhnung ber report-a a lan danin, kan ramah rukruk case a sang fal hle. Thingfak leh suka kawngkhar do mai mai thin hnam kan nih thin kha hria in, eiruk leh rukruk lam chi chu do tlat ang u,” a ti.
Internet khawvelah kan tawngkam kan duh tui lo thin a, kan milar leh artist-te kan sawizui duh dan a mawi lo thin hle tih Lalduhoma hian sawiin, “Hnamdang pawhin hei hi min hriatpui. Tumah fel famkim kan awm loh avangin chin tawk nei thiam ang u,” a ti.
Sawrkarin ILP kenkawh dan tur tha zawk a duang mek tih sawi bawkin, ILP neilo chu branch tinin kan venga an awm phal lo ila, dan an zawm tha lehzual ang.
Central YMA hruaitu thlan tharte chu sawrkarin lungsi takin a thawhpui dawn tih a sawi bawk.
CM-in eiruk dopuiah YMA sawm Mahni chhungkuaah bul i tan ang: – Chief minister
