Mizoram rorelna khawla lo thu tawh thin ‘Legislator’ te intelkhawmna pawl “Former Legislators Association of Mizoram” (FLAM) chuan nimin khan Mizoram Legislative Assembly Annexe Conference Hall-ah General Body Meeting an nei a, he hun hi chief minister Lalduhoma’n a hmanpui. Chief Minister Lalduhoma chuan, Mizoram chu Assembly Session Live telecast hmasa pawl a nih thu sawiin, “Kan senior te, mawi tak leh zahawm taka House-a in lo awm thin vangin vawiin thlengin MLA ni lai te nungchang pawh a mawi zui zel niin ka hria. Tun hnaiah hnam dangte tih dan tha lo entawn kan ching tan a. Lim inhalsak te ka ching ve tan ta. Hetiang hi tha lo ka ti a, kristian kan nih anga kan tih atana mawi tak leh kan tih vea mawi lo hi a awm, kan thliar thiam a tha hle,” tiin a sawi.
Chief minister chuan candidate chan a har viau thin a, candidate zinga a tam zawk fe hi an tla leh a, mipui thlan tlin nih hi thil awlsam a ni ngai lo tiin, FLAM member-te chuan Pathian malsawmna an dawng a, an vannei hle tih a sawi a. Rambuai avangin kum sawmhnih hmasawnna hna kalpui hlei thei lovin Mizoram hi kan awm a. Chu ti chung chuan vawiinah hian hmasawn chak pawl tak state kan ni a; hei hi kan MLA lo ni tawh thin te thawhrim rah a ni, a ti a. Tun hnaia Session neih zawh takah FLAM member-te MR Bill amendment pass a nih thu leh a lawmpui thu a sawi bawk.
FLAM member-te chu rei tak dam tura a duhsak thu leh MLA ni lai te pawh hi inthlahrung hauh lova thurawn tha pe fo turin a sawm a. Chief Minister hian Prof JV Hluna lehkhabu ziak pahnih a tlangzarh nghal a ni.
FLAM President Liansuama pawhin thu sawiin, Mizoram sawrkarin MR bill tha zawk a siamsak avangin an lawm hle tih a sawi a. He thil hi hun rei tak kan lo beisei tawh thin a, hmu mai dawnin kan inngai a, kan hmu mai thei thin si lo va. Chief Minister Pu Lalduhoma hnenah kan thlen a, rang takin min chinfelsak ta a ni, a ti. FLAM President hian tun laia thalai thi tam lutuk pumpelhna kawng zawn a tul hle nia an ngaih thu leh a theih ang anga hma la tura sawrkar an beisei thu a tarlang a. Naupangte hnena nasa zawk a zirtir a tul nia an ngaih thu a thlen a ni.
FLAM hi kum 1994-a din a ni a, tunah hian member 117 leh associate member (ex MLA/MP te an thih hnua an aiawh an nupuite) 59 an awm mek. An zinga pahnih Pi Rothangi w/o Ch. Chhunga leh Pi Nghakliani w/o Lalrinliana Dawrpui te chuan kumin hian kum za an tling a, chawimawina an hlan a ni.
Mizoram UT inthlan hmasa ber 1972 -a tling mi 30 leh nominated member 3 te zing atangin mi pasarih an la dam a, an zinga pathum ten nimina an meeting hi an la telpui thei a ni. Kum 2024-25 chhungin an member pathumte an boral a, chungte chu Pi Lalzarliani Hmar w/o Pu Biakchhunga, Pi Pangkungi w/o Pu H. Lalsangzuala leh Pu Kapoor Chand Thakuri (1972 MLA nominated) te an ni.
Sawrkara an lo dil thin tawh angin Mizoram State Assembly Budget Session hnuhnung ber, March ni 17 khan Ex-MLA te hamthatna, The Mizoram Salaries, Allowances and Pension of Members of the Legislative Assembly (Amendment) Bill, 2025 chu a pass a, an Medical facility-a an vah velna senso bill theih loh ni thin kha paih a ni.
Inkhawm hi Prof JV Hluna, Vice President in a kaihruai a, Upa H. Liansailovan hunserh hmangin, an member thite sunna John Rotluangliana, General Secretary kaihhruaiin an hmang a, General Secretary TC Pachhunga leh Treasurer Rochhunga Ralte ten report an pe bawk.
FLAM Associate Member pahnih – Pi Rothangi w/o Ch. Chhunga leh Pi Nghakliani w/o Lalrinliana Dawrpui te hnenah kumina kum za an tlin lawmpuina leh chawimawina hlan a ni
CM-in FLAM intawhkhawm hmanpui Kan senior-te avangin MLA te nungchang a mawi: Lalduhoma
