PHD Chamber of Commerce & Industry chuan Zirtawpni khan Guwahati-ah 3rd Edition of Momentum North East 2024 an buatsaih a. Mizoram chief minister Lalduhoma chu khuallian niin, adviser to chief minister KC Malsawmzauva chu khualzahawm a ni.
Chief minister chuan a kaihhruai sawrkarin khuarei daih hmasawnna (sustainable development) nei turin kawng hrang hrangin hma a la tan a. Infrastructure lam, industry, IT, education leh health sector, energy leh skill development lama hmasawnna tur awm apiangah hma la thei leh thiamte tanpui turin an inbuatsaih tih a sawi.
Loneitute thlai thar leisaka an tana market nghet tak buatsaih turin hma lak nghal a nih thu pawh sawiin, “Mizorama leilung hausakna awm ang ang, a bikin mau leh medicinal plant lam pawh, a hman tangkaina hria, thawkchhuak theite chu ‘bana kaih’ policy hmangin nasa takin tanpui kan tum a. Mahnia intodelh ram nih nei tumin kan bei dawn,” a ti.
Huang hrang hrangah hmasawn theihna remchang a la tam tih chief minister hian a sawi a. Heng huangah hian mimal enkawl emaw company pawh, a hlawkna kan tel tlan theihnan hma rawn la turin a sawm tih a sawi. “Mizoram rawn tlawh ula, resource awmte rawn hmu in, mipui nunphung rawn hria ula, ram ralmuang leh mawi tak a ni tih mit ngeiin rawn hmu rawh u,” a ti.
He hunah hian India ram hmun hrang hrang atanga kalkhawm industry leh company neituten an hnathawh leh hmalak theihna an neih dan an sawifiah a. A tul anga inbe chhunzawm turin ruahmanna an siam a ni.
CM-in hma la turin industry leh company dintute a sawm
