Assam nena ramri buai chungchangah Mizoram chief minister ni lai mek chuan khatihlaia a tawngkam hman chu tun hnuah nuihza siam nan a hmansak niin MNF MP candidate K Vanlalvena chuan a sawi.
Lawngtlai leh Siaha lama MP inthlan campaign-a a kalnaah K Vanlalvena chuan, Assam nen kan buai hlim khan Assam chief minister-in Mizoramah sipai tha chi commando 4000 a rawn tir dawn tih media-ah a lo hmu a, chanchinthar thehdarhtuten an rawn kawm a, an lokal leh a nih chuan kan lo tingmit vek ang, a tih kha, tuna kan ram hruaitu lu berin nuihza siam nan a hmansak niin a sawi.
“Mak chu ka ti a, ka huat phah chuang lo. Ram hruaitute chuan ram hi kan theih anga nasa in kan hmangaih theuh turah ka ngai. MP inthlan awm tawhah ruling hian opposition lam an beih vak vak ka hre ngai lo, kei chuan beih ka tawk nasa hle a. Tunah hian Pathian ka hmachhuan a, kei leh kan party hi tla hlim ni mah ila, Lalpa’n min pui anga, ka thlaphang lo reng reng,” a ti.
Politics a khelh chhan chu sum leh pai, ther hlo lam a ni lo tih Rajya Sabha MP nilai hian sawiin, “Kan hnam damna tur atan a ni zawk. Kan hnam damna tura politics khel ngam lo chuan khel lo mai rawh se, tih hi ka ngaihdan a ni,” a ti.
CM-in ka thusawi a nuihzat – K Vanlalvena
