Chief minister Zoramthanga chuan Ningani zing khan Laipuitlang leh Ramhlun Veng tlawhin khawtlang hruaituten an veng mamawh hmasawnna tur sawrkara an dil hmunhmate a en.
Laipuitlang Local Council-in Recreation Centre (Mini Sports Complex) sak an dilna hmunhma an en hoa; khawtlangin Sports Centre an mamawh dan pawh hruaituten an lo thlen.
Hemi hnu hian Ramhlun Venglai khawtlangin Hall sakna atan an dil hmunhma a en a. Ramhlun Venglai Local Council leh khawtlang hruaitu dangten lo dawngsawngin, hall an mamawhna leh a hmunhma an thlan dan an lo hrilh. Ramhlun North khawtlang hruaituten ‘Taitea Step’ an tih mai, lirthei kal theiha siam an dil hmunhma a en leh hnu ah Ramhlun Vengthar Primary School hmunhma, building lian zawk saa khawtlang mamawh hmunhma hrang hrang dah belh theih tura siamthat an dil hmun a en a ni.
Hemi hnu hian Ramhlun North thlanmual hlui kaltlanga Local Council Road leh Sihpui Road inkar kawng laih an dilna hmun chu chief minister hian a en a; Ramhlun Vengthar khawtlang hruaituten an veng chhung hmun awl, vantlang hmun pawimawh atana din an rawtna hmun leh Vengthar H/S panna kawngpui mumal zawk, vengchhung inkalpawhna kawng pawimawh tak ni bawk sial belh an dilna hmunhma bakah Ramhlun Sports Complex Vengin Community Hall sak an dilna hmunhma a enpui bawk.
CM-in khawtlang ngenna enpui
